Shqiptarët kërkojnë shkarkimin e tij, Gledis Nano lë pa pushime vere efektivët e vijës bregdetare

Vdekja tragjike e 7-vjeçares Jonada Avdia në plazhin e Potamit ka tronditur të gjithë vendin por ka rritur edhe frikën te shqiptarët se sa të sigurt jemi në kohën kur policët s’po mbrojnë por po vrasin. Ishte efektivi Arjan Tase ai që me një gomone të fuqishme i mori jetën 7-vjeçares e cila ishte duke u larë në breg të detit bashkë me babain e saj. Kjo vdekje solli reagime të forta nga qytetarët të cilët edhe protestuan duke kërkuar dorëheqjen dhe shkarkimin e ministrit Bledi Çuçi, ministres Mirela Kumbaro dhe drejtorit të Policisë, Gledis Nano.

Ky i fundit në një dalje për mediat ka njoftuar pezullimin e të gjitha lejeve për punonjësit e strukturave të policisë për vijat bregdetare dhe zonat turistike, deri në përfundimin e sezonit turistik. Sipas tij e gjitha kjo do bëhet me qëllim rritjen e parametrave të sigurisë në plazhe dhe vendosjen e policisë në dispozicion të plotë.

Një lëvizje e tij nxjerr zbuluar Policinë e Shtetit, paaftësinë dhe kapacitetin e saj për të mbuluar një sezon turistik i cili vetëm si i tillë nuk mund të quhet. Pasi plazhet janë braktisur, çmimet janë në stratosferë dhe siguria në bregdet s’ekziston fare, pushuesit duhet të lahen bashkë në ujë me motorët dhe skafet.