Si e “fundosi” Rama, zbardhen prapaskenat e përplasjes me Çuçin

Tensionet brenda Partisë Socialiste kanë dalë në sipërfaqe, duke zbuluar një përplasje të fortë mes kryeministrit Edi Rama dhe drejtuesit të grupit parlamentar, Bledi Çuçi. Konflikti, që fillimisht nisi si një betejë për ndikim mbi Komisionin e Prokurimit Publik (KPP), përfundoi në një akt të pazakontë kundërshtimi në Kuvend.

Burime brenda mazhorancës bëjnë me dije se gara për drejtimin e KPP-së u shndërrua në një duel të hapur mes figurave kyçe të PS-së. Nga njëra anë, ministri i Drejtësisë Ulsi Manja mbështeti fuqishëm kandidaturën e Ismail Shehut, ndërsa nga ana tjetër Bledi Çuçi loboi për bashkëpunëtorin e tij të afërt, Enea Hotin.

Situata u tensionua deri në pikën që kërkoi ndërhyrjen direkte të kryeministrit Edi Rama, i cili mblodhi urgjentisht drejtuesit e komisioneve parlamentare dhe imponoi vendimin politik përfundimtar: në krye të KPP-së do të vendosej Ismail Shehu. Ky vendim u interpretua si një goditje e drejtpërdrejtë ndaj peshës politike të Çuçit brenda grupit parlamentar.

Pak kohë pas këtij episodi, në Kuvend u paraqit me procedurë të përshpejtuar një marrëveshje e rëndësishme ushtarake me SHBA-të, që parashikon një hua prej 302 milionë dollarësh. Në rrethana normale, një marrëveshje e tillë do të shqyrtohej nga Komisioni i Sigurisë Kombëtare, i drejtuar nga vetë Çuçi.

Megjithatë, projektligji u devijua drejt Komisionit të Ekonomisë, duke anashkaluar strukturën përgjegjëse për çështjet e sigurisë. Ky veprim u pa si një tjetër sinjal politik për të kufizuar rolin e Çuçit në vendimmarrje.

Kulmi i përplasjes u shënua gjatë seancës plenare. Edhe pse i pranishëm në sallë, Bledi Çuçi refuzoi të marrë pjesë në votimin elektronik për miratimin e marrëveshjes, duke realizuar një bojkot të heshtur brenda radhëve të mazhorancës.

Ky zhvillim konsiderohet si një tregues i qartë se përçarjet brenda PS-së për kontrollin e institucioneve kyçe dhe burimeve financiare po thellohen, duke sinjalizuar një fazë të re tensionesh në kampin qeverisës.