Si e kontrollonte “Loli” trafikun e kokainës nga Ekuadori në zemër të Italisë

Qindra kilogramë kokainë udhëtonin nga Ekuadori drejt Romës, duke kaluar përmes portit të Roterdamit dhe fshehur mjeshtërisht në kontejnerët e anijeve tregtare. Në qendër të këtij trafiku ndërkombëtar që llogarit fitime mbi një milion euro, hetuesit italianë kanë identifikuar një emër tashmë të njohur për drejtuesit e antimafias: një shqiptar i njohur me pseudonimin “Loli”.

LaRepublica shkruan se sipas hetimit të kryer nga Guardia di Finanza, që çoi të enjten në vendosjen e tetë masave sigurie me burg të kërkuara nga Drejtoria e Antimafias, “Loli” rezulton të jetë koordinatori kryesor i rrjetit, nga Holanda deri në kryeqytetin italian. Përmes komunikimeve të enkriptuara, ai organizonte porositë, mbërritjet dhe shpërndarjen e kokainës, duke kontrolluar një zinxhir që niste në Amerikën e Jugut dhe përfundonte në periferitë e Romës.

Hetimi ka dokumentuar 210 kilogramë kokainë të shitur dhe 130 të tjera të sekuestruara, si dhe zbulimin e një servisi të fshehtë ku modifikoheshin bagazhet e automjeteve të destinuara për transportin e drogës sapo mbërrinte në Europë.

Një nga dëshmitarët kyç, bashkëpunëtori i drejtësisë Fabrizio Capogna, ka dhënë detaje të rëndësishme për rolin e “Lolit”. Në dëshminë e tij të korrikut 2024, gjatë procesit për vrasjen e Fabrizio Piscitelli-t (“Diabolik”), ai ka treguar se shqiptari ofronte kokainë me çmime dukshëm më të ulëta se rivalët:

“Na jepte drogën me 26 mijë euro për kilogram, kur më parë e paguanim 31 apo 32 mijë”, deklaronte Capogna.

Dëshmitë e tij ndër vite kanë ndihmuar autoritetet italiane të zbardhin ngjarje të rëndësishme kriminale në Romë. Ai ka rrëfyer gjithashtu konfliktet e tij me njerëzit e Michele Senese-s – Leandro Bennato dhe Peppe Molisso – të cilët e akuzonin për “kalim te shqiptarët”.

“Më akuzoi se po ha si shqiptarët. I thashë që është çështje çmimi: nëse më japin çmimin e Lolit, blej te ata. Unë jam njeri i biznesit, jo i diskutimeve”, ka treguar Capogna.

Por besnikëria ndaj “Lolit” nuk i kushtoi pak: ai zbuloi se ishte tradhtuar, pasi dikush i kishte vjedhur 10 kilogramë kokainë. Sipas tij, vjedhja ishte një mesazh kundër shqiptarit, ndërsa më vonë mësoi se “Loli” kishte nisur bashkëpunimin me të njëjtët njerëz që e kishin sulmuar Capognan.

“Zbulova se Loli kishte filluar punë me ta: ishin ulur bashkë në tavolinë, ndërkohë që unë ende e merrja nga ai vend”, rrëfeu ai.

Hetimet vazhdojnë, ndërsa Antimafia italiane pritet të zbardhë lidhjet e tjera të grupit dhe rolin e “Lolit” në trafikun transkontinental të drogës.