Si Rama i shndërroi pronarët e mediave kombëtare në “investitorë strategjikë”

Një mekanizëm i ndërtuar në mënyrë të qëllimshme dhe të shtrirë në çdo hallkë të sistemit, sipas gazetarit Klodian Tomorri, ka vënë median shqiptare nën kontrollin e qeverisë përmes shndërrimit të pronarëve të saj në të ashtuquajtur “investitorë strategjikë”.

Sipas tij, kjo strategji i ka hapur rrugë ekzekutivit që ta përdorë median si instrument politik, duke e kthyer atë në shërbim të interesave të qeverisë. Tomorri theksoi se pronarët e tre mediave më të mëdha kombëtare janë shpallur “investitorë strategjikë” përmes ligjeve dhe vendimeve të posaçme të qeverisë së drejtuar nga Edi Rama.

Kjo, sipas gazetarit, është mënyra kryesore se si pushteti e ka futur median “nën kontroll”, për ta përdorur më pas si armë kundër opozitës dhe për të neutralizuar çdo zë kritik. Qëllimi final i këtij mekanizmi është krijimi i perceptimit se nuk ekziston asnjë alternativë më e mirë qeverisëse. Çdo figurë politike që tenton të sfidojë kryeministrin, paraqitet si po aq e keqe ose më e keqe se ai, duke ushqyer idenë e një pushteti pa alternativë reale.

Në themel të këtij sistemi, sipas Tomorrit, qëndron përvetësimi i aseteve dhe fondeve publike. Ai shpjegoi se paratë e përfituara në mënyra të dyshimta – përfshirë shpronësime tokash dhe pronash publike në favor të interesave private – përdoren më pas për të financuar propagandën. Në këtë mënyrë, fondet që u merren qytetarëve, rikthehen kundër tyre përmes blerjes dhe kontrollit të mediave.

Debati në studio u nxit nga një rast konkret, i cilësuar si “rrëmbim i aseteve publike” ose, në një version më të zbutur, “favorizim”. Tomorri theksoi se shpronësimi i pronave publike për interesa private është një akt jashtëzakonisht i rëndë, pavarësisht se çfarë linje editoriale ndjek një media. “Një media është e lirë të ketë linjën e saj editoriale,” u shpreh ai, “por këtu nuk flasim për etikë apo moral editorial, flasim për përdorimin e shtetit në funksion të interesave private”.

Sipas gazetarit, fakti që pronarët e tre mediave kryesore kombëtare janë sot investitorë strategjikë, flet qartë për modelin e ndjekur nga qeveria. “Kjo është mënyra se si Edi Rama e ka futur median nën thundrën e tij dhe më pas e ka përdorur për qëllime politike”, theksoi Tomorri në emisionin “Task Force”.

Në përfundim, ai argumentoi se Shqipëria përballet me një sistem të mirëorganizuar, i cili përvetëson paratë publike, i shndërron ato në propagandë dhe blen media, duke i përdorur si instrument kundër vetë qytetarëve që i financojnë.