Skandal në plazhin e Tales, ujërat e zeza derdhen në det në kulmin e sezonit

Në rrjetet sociale gjithçka duket ideale. Kryetari i Bashkisë së Lezhës, Pjerin Ndreu, shpërndan vazhdimisht pamje me det të kristaltë, rërë të pastër dhe mesazhe që promovojnë bregdetin si një destinacion tërheqës turistik. Por ajo që përjetojnë shumë pushues në terren është një realitet që bie ndesh me këtë fasadë digjitale.

Dhjetëra qytetarë kanë ngritur shqetësimin se në disa zona të plazhit të Tales, ujërat e zeza përfundojnë drejtpërdrejt në det. Era e rëndë, ndotja e dukshme dhe pamjet shqetësuese janë bërë pjesë e përditshmërisë për pushuesit, të cilët përballen me një situatë larg imazhit të kuruar që serviret online.

Por kontrasti është i fortë, nga njëra anë pamje promocionale me dronë, muzikë dhe slogane optimiste për sezonin turistik, e nga ana tjetër, kanalizime që derdhen në det, në të njëjtat zona ku familjet dhe fëmijët kërkojnë të pushojnë.

Turizmi nuk mund të ndërtohet mbi imazhe të përpunuara dhe reklama të bukura. Ai kërkon investime reale në infrastrukturë, trajtim të ujërave të ndotura dhe standarde që garantojnë sigurinë dhe shëndetin publik. Asnjë filtër nuk mund të fshehë ndotjen dhe asnjë video nuk mund të zëvendësojë mungesën e ndërhyrjes konkrete.

Në kulmin e sezonit turistik, kur promovimi është maksimal, pyetja që shtrohet është e drejtpërdrejtë: pse vazhdojnë ujërat e zeza të derdhen në det? Pushuesit nuk kanë nevojë për propagandë, por për një bregdet të pastër dhe të sigurt.