“Metamorfoza 2” – Dënime të rënda për grupin kriminal që përfshiu zyrtarë të lartë policie, trafik droge, armë e plane vrasjesh
Gjykata e Posaçme për Korrupsionin dhe Krimin e Organizuar ka dhënë vendimet për pjesën më të madhe të të pandehurve në dosjen e bujshme “Metamorfoza 2”, e cila ka tronditur opinionin publik për shkak të lidhjeve të saj me emra të njohur të policisë shqiptare, trafikut ndërkombëtar të drogës dhe planeve për eliminime fizike të kundërshtarëve.
Dënimet e dhëna nga GJKKO:
- Ismail Zeneli – dënohet me 15 vite burg, që me gjykim të shkurtuar konvertohet në 10 vite
- Dedan Gjoni – dënohet me 13 vite burg, që me gjykim të shkurtuar konvertohet në 8 vite e 4 muaj
- Besmir Murtati – dënohet me 12 vite burg, i konvertuar në 8 vite
- Albert Prenga – dënohet me 12 vite burg, i konvertuar në 8 vite
- Bujar Gërmizi – dënohet me 10 vite burg, i konvertuar në 6 vite e 8 muaj
- Adrian Cenaj – dënohet me 7 vite burg, i konvertuar në 4 vite e 8 muaj
Akuzat që rëndojnë mbi të pandehurit:
Sipas SPAK, grupi i strukturuar kriminal drejtohej dhe funksiononte në mënyrë të koordinuar, me role të ndara për trafik ndërkombëtar narkotikësh, sigurim kushtesh për vrasje, pastrim parash dhe përkrahje të autorëve të krimit. Ish-shefi i Krimeve, Dedan Gjoni, akuzohet edhe për shpërdorim detyre, ndërsa të tjerë si Bujar Gërmizi dhe Adrian Cenaj për armëmbajtje pa leje dhe mbështetje të kriminelëve në arrati.
Në dosje përmendet përdorimi i aksesit në sisteme të klasifikuara të të dhënave, shfrytëzimi i lidhjeve ndërkombëtare me Amerikën Latine dhe Europën, si dhe investimi i të ardhurave kriminale në hidrocentrale, prona e mjete financiare, për të “pastruar” burimin e të ardhurave.
SPAK: Një grup me lidhje zyrtare dhe strukturë mafioze
Hetimi ka zbuluar se grupi jo vetëm që menaxhonte trafik droge në shkallë ndërkombëtare, por përdorte edhe informacion zyrtar të klasifikuar për të shmangur drejtësinë, duke përfituar nga zyrtarë të korruptuar në radhët e policisë dhe institucioneve shtetërore. Mes planeve të grupit, ka rezultuar edhe sigurimi i kushteve për eliminime fizike, një formë e rëndë kriminale që rrit peshën e dosjes.
Çështja ndaj Breçanit dhe Babametos ndahet nga dosja kryesore
Ndërkohë, GJKKO ka shpallur moskompetencën për gjykimin e ish-drejtorit të Policisë së Tiranës, Erzen Breçani, dhe ish-zyrtares së Interpolit, Jonida Babameto, duke ia kaluar çështjen Gjykatës së Rrethit Gjyqësor Tiranë.
Procesi vijon – vendimet e tjera në pritje
Gjykimi për pjesën tjetër të të pandehurve dhe për disa çështje të veçuara nga dosja “Metamorfoza 2” vijon, ndërsa vendimi final pritet në javët në vijim.
