Genc Derememaj në krye të Kadastrës së Vlorës

Nga opozita në administratën e Rilindjes

Një tjetër figurë e njohur e opozitës lokale i bashkohet administratës së qeverisë Rama. Genc Derememaj, ish-kryetari i Partisë Demokratike, dega Vlorë, është emëruar në krye të Drejtorisë së Kadastrës në Vlorë, një pozicion me peshë në një nga qytetet më të nxehta për çështjet e pronësisë.

Emërimi i tij vjen pas një periudhe të shkurtër kur institucioni drejtohej në mënyrë të komanduar nga Paola Sulaj, e cila mori detyrën pas dorëheqjes së papritur të ish-drejtorit të mëparshëm.

Lëvizja ka ngjallur menjëherë reagime dhe diskutime në opinionin lokal dhe më gjerë, duke ngritur pikëpyetje të shumta për lidhjet mes ish-funksionarëve të opozitës dhe strukturave të qeverisë, në një kohë kur debati për kalimet nga opozita në pushtet është bërë temë e përhershme.

Derememaj, i njohur për qëndrimet e tij politike në të kaluarën, pritet të menaxhojë një nga institucionet më të ekspozuara ndaj kontestimeve të pronësisë, legalizimeve dhe interesave të mëdha ndërtimore, në një qytet ku toka ka vlerë të lartë dhe ku ndërhyrjet politike janë shpesh të pranishme.