SPAK nis hetimet, tenderi e-Gate dhe roli i dyshimtë i KPP

Prej rreth dhjetë ditësh, Komisioni i Prokurimit Publik (KPP) ndodhet jashtë funksionit, pasi mandati i anëtarëve të tij ka përfunduar dhe institucionit i mungon përbërja e re. Kjo situatë ka krijuar një boshllëk të rrezikshëm në një prej hallkave kyçe të kontrollit të tenderave publikë, duke lënë pezull vendimmarrje me ndikim të drejtpërdrejtë në financat e shtetit.

Në të njëjtën kohë, një procedurë prokurimi për instalimin e portave elektronike hyrëse-dalëse (e-Gate) në portet e Durrësit dhe Sarandës ka nxjerrë në pah problematika serioze. Ky projekt, i cili parashikonte një kursim mbi 37% për buxhetin e shtetit, është bllokuar pas një ankimimi nga kompania humbëse, duke ndalur përkohësisht një investim me rëndësi për kontrollin kufitar dhe modernizimin e shërbimeve.

Formalisht, ndërhyrja e KPP-së në raste ankimimi është pjesë e funksionit të saj. Por situata bëhet problematike kur vendimmarrja ngre dyshime mbi interesin publik. Sipas burimeve, me shumicë votash, procedura është anuluar dhe kontrata është orientuar drejt një operatori me ofertë më të lartë ekonomike, duke ngritur pikëpyetje mbi kriteret dhe arsyetimin e këtij vendimi.

Akoma më shqetësuese është mungesa e transparencës. Vendimi përfundimtar nuk është bërë ende publik, duke lënë në hije arsyet që çuan në përmbysjen e rezultatit fillestar dhe duke shtuar dyshimet mbi mënyrën e funksionimit të këtij institucioni në ditët e fundit të mandatit.

Ndërkohë, zhvillimet kanë marrë edhe një dimension penal. Struktura e Posaçme Kundër Korrupsionit dhe Krimit të Organizuar (SPAK), së bashku me Byronë Kombëtare të Hetimit (BKH), kanë nisur verifikime për këtë praktikë, mes dyshimeve se anëtarë të caktuar mund të kenë kërkuar përfitime në këmbim të ndikimit në vendimmarrje.

Në një kohë kur KPP është i paralizuar dhe vendimet e tij mbeten të paqartë, pasojat rrezikojnë të bien drejtpërdrejt mbi buxhetin e shtetit dhe funksionimin e projekteve strategjike. Çështja e e-Gate nuk është më thjesht një tender i kontestuar, por një provë për transparencën dhe integritetin e sistemit të prokurimit publik në Shqipëri.