Spitali deklaratë për vdekjen e 20 vjeçares shtatzënë: Sopo lindi foshnjën, pati komplikacione të rënda

“Spitali Rajonal i Gjirokastrës i shpreh ngushëllimet familjarëve për humbjen e të ndjerës, 20 vjeçares me inicialet K.M., e cila është trajtuar në këtë spital mbrëmjen e djeshme.

Menjëherë sapo është paraqitur në spital 20 vjeçarja është asistuar nga mjekët dhe ka sjellë në jetë foshnjen e saj shëndoshë e mirë. Pas ndërhyrjes operatore, e reja ka patur komplikalcione të rënda dhe megjithë përpjekjet e mëdha të stafit mjekësor nuk ka arritur të mbijetojë.

Pritet të kryehet ekspertiza mjekoligjore për ngjarjen. Spitali i Gjirokastrës siguron qytetarët që stafi i kualifikuar i spitalit tonë është në shërbim 24/7 për pacientët”, thuhet në njoftimin e spitalit.

E reja shtatzënë, është paraqitur në maternitetin e spitalit të Gjirokastrës rreth orës 03.30 të mëngjesit dhe me dhimbje të forta në bark, në muajin e nëntë. Sipas familjarëve, vajza e tyre është futur në operacion dhe mjekët i kanë njoftuar se lindja kishte shkuar mirë, dhe se nëna e foshnja gëzonin shëndet të plotë.

Te qetë nga ky lajm, familjarët shkojnë në shtëpi, ku pas disa orësh njoftohen se vajza e tyre kishte shfaqur komplikacione dhe ishte në gjendje të rëndë. Kur kanë shkuar në maternitetin e spitalit të Gjirokastrës, familjarët e Kleandra Muxhajt kanë marrë lajmin e kobshëm se 20 vjeçarja kishte ndërruar jetë.