Sulmi i Vlora Hysenit ndaj gazetares, reagojnë kolegët e saj

Shoqata e Gazetarëve Europianë dhe Asociacioni i Gazetarëve të Shqipërisë dënojnë deklaratat e ish-drejtueses së SHISH dhe kërkojnë reagim institucional

Ish-drejtuesja e Shërbimit Informativ të Shtetit, Vlora Hyseni, është përballur me reagime të forta nga organizatat e gazetarëve pas deklaratave të bëra ndaj gazetares së News24, Klodiana Lala, në momentin kur po mbërrinte në Gjykatën e Posaçme.

Teksa gazetarja e pyeti lidhur me akuzat dhe hetimin ndaj saj, Hyseni iu përgjigj me një deklaratë që përfshinte një aludim për takime të Lalës me “agjentë serbë” në Hotel Rogner.

Lala, gjatë raportimit live, e cilësoi deklaratën si një sulm ndaj gazetarëve dhe tha se Hyseni duhet të sqarojë se cilave takime u referohej.

Pas përplasjes publike, kanë reaguar veçmas dy organizata të gazetarëve.

Shoqata e Gazetarëve Europianë: Deklarata të papranueshme dhe shqetësuese

Shoqata e Gazetarëve Europianë, dega Shqipëri, ka dënuar deklaratat e ish-drejtueses së SHISH ndaj gazetares Klodiana Lala.

Në reagimin e saj, organizata i cilëson të papranueshme sulmet personale dhe insinuatat ndaj gazetarëve, veçanërisht kur ato vijnë nga një ish-përfaqësuese e lartë e institucioneve shtetërore.

Sipas Shoqatës, gazetarët kanë të drejtë të bëjnë pyetje dhe të kërkojnë përgjigje për çështje me interes publik, pa u përballur me presion, kërcënime apo përpjekje për diskreditim.

“E konsiderojmë të papranueshme që pyetjeve të gazetarëve një ish-përfaqësuese e lartë e shtetit t’u përgjigjet me sulme personale dhe insinuata që cenojnë integritetin profesional dhe mund të vënë në rrezik sigurinë e tyre”, thuhet në reagim.

Shoqata thekson gjithashtu se deklaratat marrin një peshë të veçantë për shkak të funksionit që Hyseni ka mbajtur më herët në krye të shërbimit informativ të vendit.

Në përfundim, organizata shpreh solidaritetin me Klodiana Lalën dhe u bën thirrje institucioneve kompetente të reagojnë lidhur me situatën.

Asociacioni i Gazetarëve të Shqipërisë: “Dënojmë me termat më të ashpër”

Edhe Asociacioni i Gazetarëve të Shqipërisë ka reaguar pas deklaratave të Vlora Hysenit, duke e cilësuar episodin si shantazh dhe sulm ndaj gazetares Klodiana Lala.

AGSH shprehet se një person që është nën hetim nga drejtësia duhet t’u japë përgjigje organeve kompetente dhe jo të ushtrojë presion ndaj gazetarëve.

“Çdo i dyshuar i drejtësisë duhet të japë llogari vetëm përpara drejtësisë, ndërsa shantazhet ndaj gazetarëve nuk mund të tolerohen”, thuhet në reagimin e Asociacionit.

Organizata i bën thirrje Hysenit të tërheqë deklaratat e saj dhe kërkon nga Struktura e Posaçme që ta trajtojë me seriozitet atë që AGSH e konsideron një episod shantazhi ndaj një gazetareje.

Reagimet e dy organizatave vijnë pas përplasjes së ndodhur në hyrje të GJKKO-së, ndërsa mbetet për t’u sqaruar nga vetë Vlora Hyseni baza e pretendimeve të artikuluara prej saj ndaj gazetares Klodiana Lala.