Surpriza/ G Bani drejt Fermës VIP, zbulohet kushti i reperit

Me afrimin e nisjes së sezonit të tretë të Ferma VIP, interesimi i publikut po rritet për emrat që mund të bëhen pjesë e këtij formati. Së fundmi, vëmendjen në rrjetet sociale e ka tërhequr deklarata e reperit G Bani, i cili ka lënë të kuptohet se mund të jetë një nga konkurrentët e këtij edicioni.

Përmes një postimi në profilin e tij zyrtar, reperi bëri të ditur se pjesëmarrja e tij në spektakël do të varet nga mbështetja e fansave. Ai vendosi një kusht të qartë: nëse postimi i tij arrin 30 mijë pëlqime brenda një jave, atëherë ai do të pranojë të hyjë në fermën më të famshme televizive në Shqipëri.

Në të kundërt, nëse objektivi nuk arrihet, G Bani ka lënë të kuptohet se do të qëndrojë jashtë formatit. Kjo e ka kthyer vendimin për pjesëmarrjen e tij në një lloj sfide edhe për ndjekësit, të cilët tashmë janë duke reaguar masivisht në rrjetet sociale.

Deklarata e reperit ka ndezur menjëherë diskutime mes fansave dhe ndjekësve të formatit, të cilët po pyesin nëse ai do të jetë vërtet një nga personazhet që do të sjellë dinamika të reja në sezonin e tretë të spektaklit.