“Ofrojmë para për të ekzekutuar rojen private që dhunoi qytetarin në Zvërnec”

Incidenti i ndodhur në Zvërnec po shoqërohet me një valë reagimesh alarmante në rrjetet sociale greke, ku në disa raste janë artikuluar hapur thirrje për dhunë ekstreme.

Pas publikimit të videos ku një roje private sigurie shfaqet duke ushtruar dhunë ndaj një qytetari, në platforma si TikTok janë shpërndarë komente dhe postime me përmbajtje të rëndë, që shkojnë përtej reagimit emocional dhe kalojnë në nxitje të drejtpërdrejtë të dhunës.

Në disa prej këtyre reagimeve, individë me retorikë nacionaliste kanë bërë thirrje të hapura për ekzekutimin e rojës private, madje duke ofruar edhe shpërblime financiare në këmbim të informacionit apo realizimit të aktit. Këto mesazhe janë publikuar edhe në gjuhën shqipe, çka tregon një përpjekje për të depërtuar dhe ndikuar drejtpërdrejt në opinionin publik shqiptar.

Përmbajtjet e tilla kanë shkaktuar reagime të shumta dhe janë raportuar nga përdoruesit, ndërsa vetë platforma TikTok ka ndërhyrë duke i fshirë një pjesë të tyre për shkelje të rregullave kundër nxitjes së dhunës.

Megjithatë, deri në këtë fazë nuk ka një reagim zyrtar nga autoritetet greke lidhur me këto thirrje, ndërsa mbetet e paqartë nëse është nisur ndonjë hetim për identifikimin e personave që qëndrojnë pas tyre.