Paralajmërohet kallëzim për Emiriana Sakon

Pas përmbytjes së rëndë që goditi Durrësin dhe humbjes tragjike të jetës së punëtorit Astrit Hysenaj, Prokuroria e Durrësit ka nisur një hetim penal për shpërdorim detyre dhe dërgim në terren pa masa sigurie, duke vendosur në qendër të vëmendjes kryebashkiaken Emiriana Sako dhe zinxhirin e vendimmarrjes në Bashki.

Më 8 janar 2026, me urdhër të drejtueses së Prokurorisë së Durrësit, Suela Beluli, u regjistrua procedimi penal për të zbardhur shkaqet reale të përmbytjes masive në qytet dhe në të gjithë territorin e bashkisë, një situatë që solli dëme të konsiderueshme ekonomike për familjet dhe bizneset, si edhe humbjen e një jete njerëzore.

Hetimi përfshin drejtuesit e Bashkisë së Durrësit, me në krye kryebashkiaken Emiriana Sako, si dhe vartësit përgjegjës për investimet, mirëmbajtjen dhe funksionimin e sistemit të kanalizimeve dhe evadimit të ujërave. Sipas organit të akuzës, këta zyrtarë kishin detyrimin ligjor që infrastruktura të ishte funksionale dhe që menaxhimi i situatës emergjente të kryhej sipas protokolleve të sigurisë.

Në dosjen penale është përfshirë edhe rasti i 54-vjeçarit Astrit Hysenaj, punëtor i Ndërmarrjes Komunale Plazh-Durrës, i cili u dërgua në terren gjatë përmbytjes dhe humbi jetën pasi u rrëmbye nga ujërat. Sipas hetimit, ai ishte nisur me urdhër të eprorëve për të ndërhyrë në zonën e përmbytur.

Ndërkohë, kryebashkiakja Emiriana Sako tentoi të distancohej nga përgjegjësia, duke deklaruar publikisht se punëtori ishte mbytur aksidentalisht dhe jashtë orarit të punës. Kjo deklaratë ka shkaktuar reagim të fortë nga familjarët e viktimës, të cilët e kanë cilësuar si përpjekje për të fshehur të vërtetën dhe për të shmangur përgjegjësinë institucionale.

Familjarët kanë paralajmëruar kallëzim penal ndaj kryebashkiakes, duke e akuzuar për mashtrim publik dhe për fshehje të rrethanave reale të humbjes së jetës së Astrit Hysenajt.

Sipas rregulloreve dhe protokolleve për përballimin e emergjencave natyrore, asnjë punonjës i shërbimeve publike nuk duhet të dërgohet i vetëm në terren, e aq më pak pa mjete mbrojtëse dhe pa mbështetje nga ekipe shpëtimi. Megjithatë, sipas të dhënave të hetimit, Hysenaj u dërgua i vetëm, pa pajisje sigurie dhe në kushte ekstreme rreziku.

Një familjar i viktimës ka deklaruar se Astrit Hysenaj ishte nisur për në punë në mëngjes, pavarësisht kundërshtimit të familjes për shkak të motit të keq. Ai kishte veshur uniformën e punës dhe kishte dalë nga shtëpia pasi kishte marrë urdhër nga drejtuesit, duke humbur jetën gjatë kryerjes së detyrës dhe brenda orarit zyrtar të punës.

Familja ka kërkuar që ngjarja të njihet zyrtarisht si humbje jete gjatë punës dhe që përgjegjësit institucionalë të mbajnë përgjegjësi penale. Ata kanë theksuar se deklaratat publike të kryebashkiakes synojnë të zhvendosin fajin dhe të minimizojnë rolin e Bashkisë në këtë tragjedi.

Në urdhrin e nisjes së hetimit, Prokuroria e Durrësit thekson se do të analizohen të gjitha rrethanat që çuan në humbjen e jetës së Astrit Hysenajt, pasi ekzistojnë dyshime të arsyeshme për kryerjen e veprës penale të “shpërdorimit të detyrës” nga personat përgjegjës për mirëmbajtjen e infrastrukturës dhe menaxhimin e situatës së përmbytjeve në Bashkinë e Durrësit.