Zbulohen 2 mijë bimë kanabis në Shkodër, arrestohen dy persona

Një operacion i gjerë antidrogë i zhvilluar nga Policia e Shkodrës ka goditur dy raste të kultivimit të bimëve narkotike në zonat malore të qarkut, duke çuar në arrestimin e dy personave dhe procedimin penal të një tjetër.

Aksioni, pjesë e operacionit të koduar “Territor i Pastër”, u përqendrua në fshatrat Ndrejaj dhe Vukël, ku u zbuluan dhe asgjësuan gjithsej 2098 bimë dhe fidanë të dyshuar kanabis sativa.

Në fshatin Ndrejaj, në njësinë administrative Shosh, shërbimet e policisë konstatuan 768 bimë narkotike të kultivuara në një parcelë. Gjatë ndërhyrjes, u kap në flagrancë dhe u arrestua 53-vjeçari me inicialet P. M., i dyshuar si kultivues i tyre. Në afërsi të banesës së tij, efektivët gjetën dhe sekuestruan gjithashtu 80 kubikë me fidanë të dyshuar kanabisi.

Ndërkohë, në fshatin Vukël të njësisë administrative Kelmend, u zbuluan 1250 bimë të tjera narkotike. Në këtë rast, policia arrestoi në flagrancë një 52-vjeçar me inicialet A. Ç., për veprën penale “moskallëzimi i krimit”, pasi u konstatua pranë parcelës me kanabis.

Po ashtu, ka nisur procedimi penal në gjendje të lirë për kryeplakun e fshatit Vukël, 65-vjeçarin me inicialet K. B., për mosveprim përballë aktivitetit të paligjshëm në territorin që mbulon.

Të gjitha bimët dhe fidanët e zbuluar u asgjësuan në vendngjarje me anë të djegies, ndërsa materialet procedurale i janë referuar Prokurorisë së Shkodrës për veprime të mëtejshme.

Policia bën me dije se kontrollet do të vijojnë në të gjithë territorin e qarkut, me fokus parandalimin dhe goditjen e kultivimit të lëndëve narkotike, veçanërisht në zonat e thella dhe të vështira për t’u monitoruar.

Njoftimi i policisë:

Qarku Shkodër/Vijon operacioni policor i koduar “Territor i Pastër”, kundër kultivimit të bimëve narkotike. Goditen 2 raste të kultivimit të bimëve narkotike në fshatrat Ndrejaj dhe Vukël. Kapet në flagrancë në parcelën ku kishte kultivuar bimë narkotike dhe vihet në pranga 53-vjeçari. Arrestohet në flagrancë edhe një 52-vjeçar për veprën penale “Moskallëzimi i krimit”. Procedohet penalisht kryeplaku i fshatit Vukël. Asgjësohen me anë të djegies 2098 bimë dhe fidanë kanabisi.  Shërbimet e Drejtorisë Vendore të Policisë Shkodër, në bashkëpunim me Njësinë e Sigurisë Publike Shkodër dhe komisariatet në varësi, vijojnë me intensitet kontrollet në të gjithë territorin e qarkut, me qëllim parandalimin dhe goditjen e rasteve të kultivimit të bimëve narkotike.

Në njësinë administrative Shosh, në fshatin Ndrejaj, shërbimet e Komisariatit të Policisë Shkodër konstatuan 768 bimë të dyshuara narkotike cannabis sativa. Gjatë ndërhyrjes, u kap në flagrancë dhe u arrestua shtetasi P. M., 53 vjeç, banues në fshatin Ndrejaj. Gjithashtu, gjatë kontrollit të ushtruar në afërsi të banesës së këtij shtetasi, u gjetën dhe u sekuestruan 80 kubikë të dyshuar cannabis sativa. Ndërsa, në njësinë administrative Kelmend, në fshatin Vukël, shërbimet e Komisariatit të Policisë Malësi e Madhe konstatuan 1250 bimë të dyshuara narkotike cannabis sativa. Në vijim të veprimeve, u arrestua në flagrancë shtetasi A. Ç., 52 vjeç, për veprën penale “Moskallëzimi i krimit”, pasi u konstatua në afërsi të parcelës me bimët narkotike.

Gjithashtu, nisi procedimi penal në gjendje të lirë për shtetasin K. B., 65 vjeç, me detyrë kryeplak i fshatit Vukël. Kontrollet vijojnë në të gjithë territorin e qarkut Shkodër, me qëllim parandalimin dhe goditjen e kultivimit të bimëve narkotike. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.