Zbulohet kush qëndron pas lëvizjes Salianji-Alimehmeti

Avokati Edmond Petraj ka komentuar zhvillimet e fundit brenda Partisë Demokratike, duke deklaruar se lëvizja e Ervin Salianjit dhe Ilir Alimehmetit nuk është spontane, por e mbështetur nga ndërkombëtarët.

Sipas tij, kjo është arsyeja pse dy figurat e PD po veprojnë me kaq siguri dhe pse reagimi i Sali Berishës ka qenë i ashpër.

“Lëvizja Salianji–Alimehmeti tregon se ata kanë mbështetje ndërkombëtare. Nëse nuk do ta kishin, nuk do të ishim në këtë situatë. Edhe gjuha e Berishës tregon se ai di diçka”, tha Petraj në “Quo Vadis”.

Nga ana tjetër, Salianji shprehu zhgënjimin për mungesën e reagimit të PD për skandalet e fundit, veçanërisht çështjen e Belinda Ballukut.

“Duhej të shkulej vendi për atë ngjarje. Në vende si Bullgaria dhe Rumania, për më pak ka pasur reagime të forta. PD-ja nuk po tregon forcë reagimi”, u shpreh ai.

Salianji tha se, ditën pasi Balluku u mor e pandehur, PD zgjodhi të merrej me analizën e zgjedhjeve, ndërsa vetë ai ka qenë ndër të paktët që ka kërkuar protestë të menjëhershme.