Zbulohet plani britanik anti-emigracion, preken edhe shqiptarët

Nigel Farage, lideri i partisë Reform UK, ka paralajmëruar se qindra mijëra emigrantë do të detyrohen të largohen nga Mbretëria e Bashkuar nëse partia e tij fiton zgjedhjet e ardhshme. Sipas tij, ky veprim do të kursente shtetit më shumë se 230 miliardë paund.

Në një deklaratë të fuqishme, Farage ka kritikuar atë që e quajti “mashtrim” të statusit të qëndrimit të përhershëm për emigrantët dhe ka paralajmëruar se mosveprimi ndaj këtij problemi është një “bombë fiskale me sahat” që mund të çojë në falimentimin e vendit.

Plani i Farage për emigracionin përfshin:

• Ndalimin e dhënies së “Lejes së Pacaktuar për të Qëndruar” (ILR);
• Humbjen e statusit të atyre që tashmë e kanë ILR;
• Aplikimin e një sistemi vizash më të rrepta për emigrantët, përfshirë njohjen e gjuhës dhe kërkesa për të ardhura më të larta;
• Kufizimin e mundësisë për të sjellë familjarë;
• Dëbimin e atyre që nuk përmbushin kriteret.

Farage ka paralajmëruar se ndryshimet do të bëhen gradualisht, për të mundësuar që bizneset të trajnojnë punëtorë britanikë. Ai gjithashtu ka theksuar se shtetasit britanikë do të kenë përparësi për përfitime sociale dhe se periudha për të marrë shtetësinë do të zgjatet për të parandaluar dhënien “lirshëm” të shtetësisë.

“Konservatorët dhe Laburistët e kanë kthyer Mbretërinë e Bashkuar në një bankë ushqimore për gjithë botën,” tha Farage, duke kërkuar një ndalim të emigracionit të pakontrolluar.