Përplasjet në protestën e pasdites së sotme u shoqëruan me tensione të forta mes forcave të rendit dhe përfaqësuesve të opozitës, duke sjellë pasoja konkrete për disa prej tyre. Situata u përshkallëzua kur policia përdori gaz lotsjellës për shpërndarjen e turmës, çka solli lëndime dhe probleme shëndetësore për një numër protestuesish dhe deputetësh.
Mes të prekurve janë përfshirë edhe emra të njohur të opozitës si Luçiano Boçi, Klevis Balliu dhe Aulon Kalaja, të cilët janë dërguar drejt shërbimeve të urgjencës për të marrë ndihmën e nevojshme mjekësore.
Pamjet nga momentet e përplasjes janë shpërndarë me shpejtësi në rrjetet sociale, duke ngjallur reagime të shumta në publik.
Në mesin e reagimeve, ka pasur edhe qëndrime ironizuese nga përfaqësues të mazhorancës. Një prej tyre ishte deputetja Zegjine Çaushi, e cila publikoi një video të deputetëve të lënduar duke e shoqëruar me një koment ironik.
“Ma këpute shpirtin o bukurosh! Të kisha ardhur unë të të mbaja krahun, se Belindi bën kot si i mërzitur”, shkruan Zegjine Çuashi.
Ky reagim ka nxitur kritika të forta në rrjet, ku shumë përdorues e kanë konsideruar të papërshtatshëm tonin e përdorur në një situatë ku ka persona të lënduar. Ngjarja ka rikthyer edhe njëherë debatin mbi gjuhën dhe etikën që përdoret nga përfaqësuesit politikë në komunikimin publik, sidomos në momente tensioni dhe përplasjeje sociale.
