Zhdukja e Eglant Koçit, Torba zbulon ku janë përqëndruar hetimet

Drejtori i Policisë së Tiranës, Oligert Torba, ka dhënë detaje të reja lidhur me zhdukjen e Eglant Koçi, një rast që po hetohet si ngjarje e rëndë kriminale.

Gjatë një deklarate për mediat, Torba bëri të ditur se hetimet janë marrë në dorë nga strukturat e specializuara për krimet e rënda, ndërsa dyshohet se i zhdukuri mund të jetë vrarë disa ditë më parë nga një person i afërt me të.

Sipas tij, një grup i posaçëm hetimor është angazhuar intensivisht në terren për gjetjen e trupit, me fokus kryesor zonat periferike të kryeqytetit. Kërkimet janë përqendruar veçanërisht në segmentet kufitare mes Tiranës dhe Elbasanit, ku dyshohet se mund të jenë fshehur gjurmët e krimit.

“Po ndiqet nga Krimet e Rënda në polici. Një strukturë e posaçme po merret me kërkimin e trupit. Kërkimi është fokusuar në rrethinat e Tiranës në kufirin me Elbasanin”, u shpreh Torba.

Autoritetet vijojnë operacionin e kërkimit dhe mbledhjen e provave, ndërsa hetimet mbeten në zhvillim për zbardhjen e plotë të rrethanave të kësaj ngjarjeje.