Një zjarr i fuqishëm ka përfshirë një pallat në afërsi të QSUT-së, duke shkaktuar panik tek banorët dhe një mobilizim të menjëhershëm të shërbimeve zjarrfikëse. Flakët janë përhapur me shpejtësi, duke e bërë të vështirë ndërhyrjen fillestare dhe duke rritur rrezikun për zonën përreth.
Burime nga terreni bëjnë me dije se kjo nuk është hera e parë që godina përballet me një incident të tillë. Një rast i ngjashëm është regjistruar edhe në vitin 2021, kur gjatë punimeve në objekt, fasada u përfshi nga flakët, megjithëse në një shkallë më të kufizuar krahasuar me situatën aktuale.
Dyshohet se një nga faktorët kryesorë që favorizon përhapjen e zjarrit lidhet me tipologjinë e fasadës së përdorur. Bëhet fjalë për një sistem të njohur si fasadë e ventiluar, e përbërë nga materiale me bazë poliuretani në formë shkume, të cilat janë të ndjeshme ndaj temperaturave të larta dhe mund të përshpejtojnë djegien. Një problematikë e ngjashme është evidentuar më herët edhe në një pallat në zonën e ish-Parkut të Autobusëve.
Ndërkohë, numri i të lënduarve ka arritur në shtatë persona, mes të cilëve edhe tre zjarrfikës që po luftojnë me flakët në kushte të vështira. Gjendja e tyre shëndetësore është nën monitorim.
Për të frenuar përhapjen e zjarrit dhe për ta vënë situatën nën kontroll, në operacion janë përfshirë edhe mjete ajrore. Helikopterë të Ministrisë së Brendshme po ndërhyjnë nga ajri duke hedhur ujë mbi vatrat më problematike, ndërsa ekipet në tokë vijojnë punën intensive për izolimin e flakëve.
