Zjarri shkrumbon edhe banesa në Pukë (Foto)

Situata në Pukë është rënduar ndjeshëm për shkak të zjarreve, ndërsa në zonat e prekura raportohet edhe për ndërprerje të energjisë elektrike dhe probleme me linjat telefonike.

Të gjitha vatrat e zjarrit në Gojan të Pukës kanë dalë jashtë kontrollit, ndërsa flakët janë përhapur në territor dhe janë afruar pranë banesave.

Pamjet nga terreni tregojnë dëmet e shkaktuara nga zjarri, ku disa banesa të pabanuara në Gojan janë përfshirë nga flakët. Situata paraqitet kritike, ndërsa përhapja e zjarrit po rrezikon edhe zona të tjera të banuara.

Përballë përkeqësimit të situatës, banorët po evakuohen me ndihmën e forcave të Policisë. Ndërkohë, në terren vijon ndërhyrja e forcave zjarrfikëse dhe strukturave të emergjencës, të cilat po punojnë për të frenuar përhapjen e flakëve.

Banorët kanë kërkuar ndërhyrje nga ajri për të ndihmuar në shuarjen e zjarrit, ndërsa pamjet e mbërritura nga zona dëshmojnë për përmasat e dëmeve të shkaktuara në banesa dhe në territorin përreth.

Sipas banorëve, deri në këto momente nuk ka mbërritur asnjë helikopter në zonën e përfshirë nga zjarri, ndërsa situata vijon të mbetet shqetësuese.

Ndërprerja e energjisë elektrike dhe problemet me komunikimin telefonik e vështirësojnë më tej situatën për banorët dhe ekipet që ndodhen në terren.

Forcat zjarrfikëse dhe strukturat e emergjencës vijojnë operacionin për izolimin e vatrave, ndërsa banorët kërkojnë ndërhyrje sa më të shpejtë nga ajri për të parandaluar përhapjen e mëtejshme të flakëve.