Zyrtarizohen kandidaturat për postin e Prokurorit të Përgjithshëm

Përditësuar më 3 Gusht 2026, 11:37

Zyrtarizohen emrat e kandidatëve për postin e Prokurorit të Përgjithshëm, duke shënuar nisjen e një gare të rëndësishme për drejtimin e organit më të lartë të akuzës në vend.

Sipas burimeve të besueshme të gazetares Anila Hoxha, në listën e kandidatëve përfshihen disa prej figurave më të njohura të sistemit të drejtësisë. Mes tyre janë Kreshnik Ajazi, aktualisht drejtues i Prokurorisë së Elbasanit; Fatjona Memçaj, prokurore pranë Eurojust në mandatin e saj të dytë; Arta Marku, e cila më herët ka mbajtur funksionin e Prokurores së Përgjithshme të përkohshme; si dhe Ylli Pjetërnika.

Në këtë garë marrin pjesë gjithashtu edhe Rovena Bozo, prokurore në Prokurorinë e Tiranës, dhe Adnan Xholi, prokuror në Strukturën e Posaçme Kundër Korrupsionit dhe Krimit të Organizuar (SPAK).

Procesi i aplikimeve u hap nga Këshilli i Lartë i Prokurorisë (KLP), në kuadër të përfundimit të mandatit të Prokurorit të Përgjithshëm aktual, Olsian Çela, i cili mbyllet në muajin dhjetor. Kjo garë pritet të përcaktojë drejtimin e ri të institucionit në një moment kyç për sistemin e drejtësisë në Shqipëri.