Shembje masivi dherash në aksin Herebel-Peshkopi

Segmenti rrugor Herebel – Peshkopi, i ndërtuar vetëm një vit më parë si pjesë e lotit të tretë të Rrugës së Arbrit, ndodhet përballë rrezikut real të bllokimit. Një masiv i konsiderueshëm dheu ka rrëshqitur drejt trupit të rrugës, duke ngushtuar ndjeshëm korsinë e qarkullimit dhe duke vënë në rrezik lëvizjen e automjeteve.

Ky aks përbën një pjesë të rëndësishme të Rrugës së Arbrit dhe ka kushtuar mbi 10 milionë euro nga fondet publike. Investimi është financuar nga Autoriteti Rrugor Shqiptar, ndërsa zbatimi i punimeve është kryer nga kompania “Gjoka Konstruksion”, me nënkontraktor “Selami” sh.p.k.

Rruga u përfundua dhe u inaugurua në prag të zgjedhjeve të vitit të kaluar, por pavarësisht se është një ndërtim relativisht i ri, segmenti ka shfaqur vazhdimisht problematika për banorët e zonës dhe përdoruesit e saj. Rrëshqitjet e dheut dhe pasiguria në disa pika të aksit kanë ngritur shqetësime serioze për qëndrueshmërinë e veprës dhe cilësinë e punimeve të kryera.