Kush është 23-vjeçari që sulmoi, i arrestuar në 2015

Një ngjarje e rëndë është shënuar këtë pasdite në burgun e Rrogozhinës, ku ka mbetur i plagosur rëndë një person, dhe disa të tjerë janë lënduar.

Sipas informacioneve paraprake mësohet se ka qenë 23-vjeçari Endrit Goga ai që ka nisur sherrin, ku janë përfshirë edhe disa persona të tjerë, por i lënduar rëndë ka mbetur një i dënuar, me mbiemër Bajrami, i cili është transportuar menjëherë për në spitalin e Traumës në Tiranë.

Sakaq ende nuk ka një informacion zyrtar nga policia për të sqaruar lidhur me shkaqet e këtij konflikti, i cili mësohet se ka nisur në ambientet e palestrës së burgut.

Autori i cili ka lënë të plagosur Bajramin, është dënuar në vitin 2015, pasi kishte kryer katër vjedhje, nën kërcënimin e armës.

Njoftimi i policisë në 2015:

Specialistët për Krimet e Rënda në Drejtorinë Vendore të Policisë Elbasan, gjatë ditës së djeshme, në bashkëpunim me Policinë Kufitare Morinë, bënë kapjen dhe ndalimin e shtetasit Endrit Goga, 19 vjeç, banues në Cërrik.

Ai u ndalua nga efektivat e policisë, pasi ka vjedhur me dhunë, karburantin në Fshatin Trojas – Belsh, në pronësi të shtetasit L.P, kryer në bashkëpunim me dy shtetasit e arrestuar në parë.

Materialet iu kaluan Prokurorisë së Rrethit Gjyqësor Elbasan për veprime të mëtejshme për veprën penale “Vjedhja me dhunë, kryer në bashkëpunim”.