Aksident në aksin Rrogozhinë-Lushnje, plagoset çifti i bashkëshortëve

Një aksident rrugor është regjistruar në autostradën Rrogozhinë-Lushnje, pranë rrethrrotullimit të Grabjanit, ku një automjet ka dalë nga kontrolli dhe është përplasur me barrierat anësore të rrugës.

Sipas të dhënave paraprake, automjeti fillimisht ka goditur barrierën prej betoni dhe më pas është përplasur me një tjetër mjet, i cili ndodhej i parkuar në anë të rrugës.

Si pasojë e aksidentit kanë mbetur të lënduar dy personat që udhëtonin në automjet, një çift bashkëshortësh. Pas marrjes së ndihmës së parë, të plagosurit janë transportuar drejt spitalit të Lushnjës për trajtim mjekësor.

Gjendja e drejtuesit të automjetit ka kërkuar ndërhyrje më të specializuar, ndaj ai është transportuar drejt Spitalit të Traumës në Tiranë.

Ndërkohë, shërbimet e Policisë kanë shkuar në vendngjarje dhe po kryejnë veprimet e nevojshme për dokumentimin e aksidentit. Pritet që hetimet të përcaktojnë rrethanat dhe shkakun e përplasjes.