Shënohet rasti i parë i koronavirusit në Kroaci

Një rast i infeksionit koronavirus është konfirmuar në Kroaci.

“Është një i ri, në Klinikën Fran Mihaljević për Sëmundjet Infektive në Zagreb”, konfirmoi Kryeministri Andrej Plenkoviç, në një deklaratë për mediat.

Ai tha se personi i shtruar në spital ishte në gjendje të mirë.

“Ne morëm rezultate sot në 11:30 për një qytetar kroat që po qëndronte në Milano midis 19 dhe 21 shkurt. Ai tregoi shenja të një sëmundjeje të lehtë, ne jemi duke marrë masa paraprake,” citohet ministri i Shëndetësisë, Vili Beros, nga media kroate “Index”.

Ai shtoi se tani shërbimet shëndetësore do të përqendrohen te kontaktet që ka pasur njeriu i infektuar.

“Ne jemi duke rritur nivelin e përgatitjes dhe mbrojtjes sonë. Sistemi shëndetësor është i gatshëm, ai ka të gjitha opsionet, ne do të bëjmë gjithçka mundemi për t’i bërë qytetarët tanë sa më të sigurt. Duhet të theksohet se është një sëmundje që është e ngjashme me gripin e zakonshëm ”, tha Beros.

Ndërkohë drejtori i Spitalit Publik të Rijekës iu drejtua publikut, duke raportuar për gjendjen e nëntë kroatëve që ishin shtruar në spital pas kthimit nga Italia.

Rezultatet e tyre të testit janë ende në pritje.

Ndërkohë, Ministri kroat i Detit, Transportit dhe Infrastrukturës Oleg Butkoviç tha sot në Zadar se udhëzimet speciale në lidhje me koronavirusin do të dërgohen në portet e lundrimit, dhe se drejtuesit e kamionëve që udhëtojnë për në Itali tashmë kanë marrë rekomandime.