Nga dita e nesërme, 11 maj, 14 bashki do t’i shtohen hartës së zonave të gjelbërta në Shqipëri.
Kjo do të thotë se qytete si Lushnja, Korça, Lezha dhe Kukësi do të kenë lehtësim të masave shtrënguese, të vendosura gjatë pandemisë së koronavirusit.
Qytetet që nga nesër bëhen të gjelbërta janë:Lushnja, Patosi, Roskoveci, Korça, Hasi, Kukësi, Lezha, Mirdita, Fushë-Arrez, Malësia e Madhe, Puka, Vau i Dejës, Kavaja dhe Vora.
Këmbësorët dhe automjetet në këto qytete do të mund të lëvizin pa nevojën e autorizimit deri në orën 21:00 të mbrëmjes. Ndërsa brenda qytetit do të lejohet udhëtimi edhe me më shumë se dy persona të së njëjtës familje.
Klinikat dentare, parukeritë dhe disa biznese në qendrat tregtare do të kenë mundësi të çelin nesër aktivitetin në të gjithë venin, por duke zbatuar protokollin e rreptë të sigurisë.
Lehtësime të tjera pritet të hyjnë në fuqi në datën 18 maj, në varësi të ecurisë së pandemisë.
