Gjobitet pronari i lokalit ku festoi ditëlindjen Bes Kallaku

Në ditëlindjen e Bes Kallakut kanë qenë të pranishëm moderatorja Arbana Osmani dhe partneri i saj, regjisori Eduart Grishaj. Të dy postuan foto nga ditëlindja e Besit, të veshur si fshatarë.

Gjithashtu kanë marrë pjesë edhe këngëtarët Klajdi Haruni dhe Bruno, të cilët kanë kënduar dhe kërcyer gjatë ditëlindjes.

Gjobën duhet ta paguajnë edhe aktori Olsi Bylyku dhe e dashura e tij Egli Tako të cilët morën pjesë në festë.

Gjithashtu në fotot e publikuara duket edhe aktori dhe krye bashkiaku socialist i Kolonjës Erion Isai me bashkëshorten e tij, të cilët do të paguajnë gjobën.

Po ashtu edhe futbollisti Andi Lila me partneren e tij ishin të ftuar dhe janë parë në një nga videot e publikuara të Bes Kallakut.

Gjashtë punonjës policie janë pezulluar dhe administratori i lokalit është gjobitur për ceremoninë që organizoi aktori i humorit Bes Kallaku me rastin e 35-vjetorit të lindjes dy ditë më parë.

“Në lidhje me aktivitetin e zhvilluar më datë 20.11.2020 në një lokal në fshatin Laknas, Bashkia Kamëz, ku shtetasi B.K, kishte organizuar një ceremoni ditëlindje dhe kishte ftuar rreth 30 persona, Drejtoria Vendore e Policisë Tiranë menjëherë mori masa në zbatim të Aktit Normativ, për parandalimin e përhapjes së COVID-19.

Nga ana e Policisë së Tiranës, u mor masa administrative 1.000.000 lekë për administratorin e lokalit shtetasin F.U., në bazë të aktit normativ nr 3 datë 15.03.2020.

Gjithashtu në bazë të pamjeve filmike janë identifikuar të gjithë personat që ishin pjesmarrës në aktivitetin e zhvilluar  dhe do ndëshkohen me masë administrative për shkelje të masave kufizuese anticovid-19.

Njëkohësisht Drejtori i DVP Tiranë ka pezulluar nga detyra 6 punonjës Policie për moskryerje të kontrollit të territorit dhe ndaj tyre Drejtoria e Standarteve Profesionale në Drejtorinë e Përgjithshme të Policisë së Shtetit ka nisur ecurinë disiplinore për shkelje të rëndë .

Drejtoria Vendore e Polcisë Tiranë apelon për të gjithë administratorët e lokaleve dhe qytetarët që të respektojnë me korrektësi masat anticovid duke bërë të mundur shkëputjen e zinxhirit të infektimit nga virusi dhe fton qytetarët që të denoncojnë në 112 e Komisariatin Dixhital cilindo administrator lokali apo qytetar që nuk i respekton këto masa kufizuese duke u kthyer në burim rreziku për shëndetin e qytetarëve” deklaron policia.