Erigers Mihasin e telefonuan të shkonte në Astir/ Çfarë u zbulua nga kamerat dhe tabulatet e celularëve?

Vijon të mbetet mister vdekja e Erigers Mihasit dhe Armand Dumanit në zonën e Astirit ditën e shtunë. Nga vëzhgimi i tabulateve të celularëve të tyre nuk është përfituar asgjë konkrete.

Sipas informacioneve dyshohet se dy të rinjtë janë kontaktuar që të lëvizin në zonën e Astirit rreth orës që ka ndodhur atentati. Hetuesit kanë sekuestruar një numër të madh kamerash dhe ka nisur vëzhgimi i tyre pranë vendit ku është djegur automjeti tip “Toyota” me të cilin lëviznin autorët. Grupet e hetimit kanë sekuestruar edhe kamera në aksin Tiranë-Milot dhe zonat përreth.

Ndërkohë në vendin e ngjarjes. pranë “2 Rrathëve” janë sekuestruar kamerat e sigurisë nga firma e ndërtimit e cila po merret me rregullimet në rrugë.

Por nga analizimi i pamjeve hetuesit nuk kanë arritur të krijojnë identikitet e autorëve që dyshohet të kenë qenë 3, të cilët kanë lëvizur me shpejtësi. Por edhe nga marrja në pyetje e dhjetëra personave që kanë qenë të pranishëm në vendin e ngjarjes, nuk është arritur të zbulohet identiteti i autorëve, apo ndonjë pistë konkrete hetimi.

Dyshimet paraprake të vrasjes së dy të rinjve, janë se atentati ka ndodhur për shkak të përplasjes mes bandave, pasi njëri prej viktimave ka qenë i përfshirë në një seri ngjarjesh kriminale.