Meta flet për institucionet e Drejtësisë që refuzojnë komisionin “Xhafaj”: Përpjekje për të mos u diskredituar

Kreu i Partisë së Lirisë, Ilir Meta ka komentuar faktin që të gjitha institucionet e drejtësisë kanë refuzuar kërkesën e komisionit Xhafaj për të marrë pjesë në mbledhje.

Meta u shpreh se të gjitha këto institucione janë të kapura dhe e gjitha kjo është një përpjekje për të mos u diskredituar më tej si instrumenta të kapur nga regjimi i Ramës.

“Të gjitha këto janë të kapura. Kjo është një përpjekje për të mos diskredituar më tej si instrumenta të kapur nga regjimi i Ramës. Ky është komisioni më absurd që mund të ndodhte dhe mund të krijohej”, tha Meta.

Presidenti i Partisë së Lirisë Ilir Meta e cilësoi sot poshtërim të pensionistëve indeksimin e pensioneve nga qeveria Rama me 4.1%.

“Indeksimi i pensionit me 4.1% është poshtërimi më i madh që Rama iu bën pensionistëve, që nga 1 nëntori do iu shtrenjtohet produkti bazë buka”, deklaroi Meta.

Duke komentuar emrin e Ilir Prodës në krye të policisë, Meta tha se ajo kontrollohet nga Edi Rama. “Në krye të policisë së shtetit është Edi Rama. Nuk kanë asnjë rëndësi ndërrimet e drejtuesve”, tha ai.

Lidhur me ngjarjet e djeshme në Kuvend, Meta deklaroi se “qëllimi i Edi Ramës është të mos ketë opozitë në Shqipëri dhe pa asnjë diskutim që burgosja politike e deputetit të nderuar zotit Salianji, jo vetëm që nuk do të ndërpresë denoncimet por do të rrisë më tej zemëratën jo vetëm deputetëve, por qytetarëve”.