Salianji mesazh nga burgu: Qëndresa e popullit opozitar është shkatërrimi i qeverisë

Ish-deputeti i Partisë Demokratike, Ervin Salianji ka dërguar mesazh nga burgu për qytetarët që do të protestojnë pasditen e sotme.

Salianji shkruan se në këto orë, ata po korrin frikën që mbollën vetë dhe qëndresa e popullit opozitar është shkatërrimi i qeverisë. Ai më tej thotë se nuk mund të humbet dinjiteti dhe se populli shkund çdo tirani.

Mesazhi i Salianjit:

Në këto orë, ata po korrin frikën që mbollën vetë!

E dimë që  menduan se do na frikësonin, e sot më shumë na forcuan. Qëndresa jonë është shpërbërja e tyre!  Ne e dimë që shumë nga ne sakrifikojnë e rezistojnë sepse na takon ne së pari të jemi muri që ndal të keqen. Na takon ne dhe vetëm ne të jëmi forca e shembullit.

Miq,

Të humbësh lirinë për të fituar forcën e goditjes ndaj padrejtësisë, është zgjedhje e ndërgjegjies. Të humbësh lirinë në betejë për të fituar demokracinë e qeverisje të mirë për njerëzit, është vlera më e lartë.

Të humbësh lirinë  duke fituar besimin në sakrificë është forma më ë lartë e fisnikërisë civile. Të fitosh lirinë duke protestuar me besimin që shqiptarët meritojnë një tjetër zgjidhje, është rruga!

Reago, mos humb veten, as dinjitetin, as të drejtat!

Reago, sepse forca dhe e drejta janë me ty!

Reago!  Reago për pagën e degraduar; për fitimin e munguar; për pronën e pafituar, për jetën e shtrenjtuar, për fjalën e cunguar, për shpresën e mpirë, për një Shqipëri më të mirë.

Populli shkund çdo tirani!