Kaliforni/ 2 viktima dhe 20 të plagosur nga përplasja e një avioni me magazinën

Një aeroplan privat i vogël u rrëzua në një magazinë në Kaliforninë e Jugut të enjten, më 2 janar, duke shkaktuar dy viktima dhe 20 të plagosur.

Avioni, i markës Van RV-10, u përplas me ndërtesën rreth orës 14:15 sipas orës lokale, duke shkaktuar zjarr dhe dëme të mëdha në objekt. Sipas hetuesve dhe ekipeve të kërkim-shpëtimit, avioni ishte i stacionuar pranë aeroportit Fullerton.

Aeroplani u nis nga pista 24 e Fullertonit rreth orës 14:00, arriti një lartësi prej rreth 300 metrash dhe, pak çaste më pas, piloti kërkoi kthim të menjëhershëm në aeroport.

Përplasja shkaktoi dëmtime në sistemet e fikjes së zjarrit të magazinës, duke rritur rrezikun për sigurinë e personave të tjerë. Si pasojë, ndërtesa u evakuua menjëherë nga zjarrfikësit.