Besimtarët myslimanë kremtojnë sot Fitër Bajramin

Pas një muaji agjërimi dhe sakrifice, besimtarët myslimanë në Shqipëri festojnë sot (30 mars) Fitër Bajramin.

Në Tiranë, mijëra besimtarë u mblodhën në “Sheshin Skënderbej” për faljen e Bajramit, organizuar nga Komuniteti Mysliman i Shqipërisë (KMSH). Ceremonia nisi në 06:45 me leximin e Kuranit dhe ligjëratën, ndërsa pritjet tradicionale në selinë e KMSH-së do të zhvillohen nga 09:00 deri në 12:00.

Kreu i KMSH-së uroi besimtarët, duke theksuar rëndësinë e solidaritetit dhe ndihmës për ata në nevojë.

“Le të jetë Fitër Bajrami një moment vetëdijësimi për dinjitetin dhe vlerat njerëzore. Qoftë kjo festë burim mirësie, dashurie dhe uniteti për të gjithë,” u shpreh ai.

Presidenti Bajram Begaj e cilësoi Bajramin si “festën e gëzimit, paqtimit të shpirtit dhe shpresës në mëshirën e Zotit”.
Ndërkohë, Kryeministri Edi Rama falënderoi besimtarët për përkushtimin e tyre gjatë muajit të shenjtë të Ramazanit, duke uruar që “Zoti t’ju pranoftë lutjet dhe t’ju shpërblejë për sakrificat”.

Mijëra besimtarë myslimanë u mblodhën mëngjesin e sotëm në sheshin “Skënderbej” për të kryer faljen e Fitër Bajramit, por një ndryshim i papritur i orarit nga Komuniteti Mysliman Shqiptar ka sjellë pakënaqësi dhe ka lënë shumë besimtarë pa mundësinë për të përmbushur këtë rit të rëndësishëm.

Komuniteti Mysliman kishte njoftuar më herët se falja do të kryhej në orën 7:30, por drejtuesit e tij e nisën dhe përfunduan atë në orën 7:15, duke shkaktuar konfuzion dhe zemërim mes besimtarëve që mbërritën në kohën e lajmëruar zyrtarisht.

Ky veprim, i paprecedentë në organizimin e faljes së Bajramit, ka ngritur pikëpyetje mbi arsyet që çuan në këtë ndryshim të paqartë të orarit. Besimtarët e pranishëm shprehën zhgënjimin e tyre, duke kërkuar një shpjegim nga drejtuesit e Komunitetit Mysliman, të cilët ende nuk kanë dhënë një reagim zyrtar mbi situatën.