Kush ishte personi që mbante kontakt me bandën Çopjave

Flobens Meçja, njohur edhe me mbiemrat Gega dhe Drini është mes personave të arrestuar gjatë operacionit të policisë së Durrësit në një restorant në zonën e Lalëzit.

43-vjeçari ishte shpallur në kërkim nën dyshimet se ka qenë anëtar aktiv i një grupi kriminal. Më konkretisht, emri i tij del në disa biseda në “Sky ECC” me Franc Çopjën, i cili i ofron 5 milionë euro për vrasjen e Erion Alibejt, i njohur me nofkën “Krymi” në Elbasan.

Në të njëjtat biseda, Çopja i ofron nga 1 milion euro për vrasjen e shtetasve Arjan Spahiu, Aldo Baho dhe shtetasit Ilir Lloshi, të cilit i referohen me pseudonimin ‘Liçe’. Në këto biseda, që janë në dosjet e SPAK, Flobens Meçja shprehet i gatshëm të kryejë vrasjet.

Sipas këtyre bisedave, në një moment, Flobens Meçja i thotë Franc Çopjas se me këtë shifër po e nxirrte në pension, duke nënkuptuar se nuk kishte më nevojë që të kryente vrasje.

Bisedat janë kryer në kulm të përplasjes së bandave rivale në qytetin e Elbasanit, vrasje që pasuan masakrën e Bradasheshit, ku mes viktimave ishte edhe Endrit Alibej, vëllai i Erion Alibej. Masakra pasoi hakmarrjen e këtij të fundit, që urdhëroi vrasjen e disa personave që dyshonte se ishin autorë.