A po e mëson Fatmir Xhafaj Erion Veliajn për të jusifikuar akuzat?!

Një akt noterial i publikuar së fundmi nga kryetari i Bashkisë së Tiranës, Erion Veliaj, ka ngritur pikëpyetje serioze mbi vlerën dhe qëllimin e tij juridik. Por ajo që ka tërhequr edhe më shumë vëmendje, është ngjashmëria e habitshme e këtij akti me një deklaratë të bërë disa muaj më parë nga ish-ministri i Brendshëm, Fatmir Xhafaj, në emisionin “Opinion”.

Në atë intervistë, Xhafaj fliste për praktika të ndryshme që përdoren për të krijuar alibi apo për të ndërtuar narrativën e duhur politike përmes akteve noteriale që në thelb nuk kanë asnjë vlerë ligjore, por që përdoren për konsum publik.

A po ndjek Veliaj “udhëzimet” e Xhafajt?

Sapo Veliaj publikoi aktin noterial, për të cilin ai pretendon se “hedh poshtë akuzat” që e lidhin me afera të ndryshme, shumë analistë dhe komentues politikë vunë re menjëherë përputhjen me modelin që përshkroi Xhafaj në deklaratën e tij.

Dyshimi është se ky akt nuk është gjë tjetër veçse një përpjekje për të manipuluar perceptimin publik dhe për të shfryrë presionin mediatik e politik që ka rënë mbi Veliajn në muajt e fundit.

Fakti që vetë Xhafaj, si figurë me përvojë të gjatë në sistemin e drejtësisë dhe politikës, ka përmendur më herët përdorimin e akteve noteriale si mjete për të ndërtuar alibi ose për të “larë duart” nga përgjegjësia, ngre pikëpyetje të mëdha:

A po e këshillon Xhafaj Veliajn në prapaskenë? Apo ishte deklarata e tij një “manual i hapur” për çdo politikan që ndodhet nën presion?

Për momentin, nuk ka prova të drejtpërdrejta për lidhje të tilla, por rastësia është shumë e madhe për t’u injoruar.