LIBRAZHDI “FLUTURON” NË QIELL ME 300 MILIONË LEKË: PARK AVENTURES, BALLKON PANORAMIK DHE OBSERVATOR ASTRONOMIK NË MES TË VARFËRISË

Tenderi 300 milionësh që zbulon mënyrën si shpenzohen fondet publike për të parë “yllin e korrupsionit”

Nga Publik.al | 

Një bashki e varfër që sheh yjet, por nuk sheh baltën

Në një nga bashkitë më të varfra të Shqipërisë, ku ende mungojnë rrugët, ujësjellësit dhe kanalizimet, Bashkia Librazhd ka vendosur të investojë gati 300 milionë lekë të vjetra për ndërtimin e një “parku aventuresk me observator astronomik”  një projekt që premton zip-line, ballkon panoramik dhe teleskop për të parë yjet.

Një ide që mund të tingëllojë romantike në letër, por që në realitet zbardh mënyrën sesi pushteti vendor i trajton prioritetet publike: me sy nga qielli, por me këmbët në baltë.

Tenderi “me sy nga yjet”

Sipas të dhënave nga Agjencia e Prokurimit Publik, tenderi mban numrin REF-60766-09-09-2025, me objektin:

“Ndërtim i parkut aventuresk (zip line, ballkon panoramik, observator astronomik)”.

Autoritet kontraktues: Bashkia Librazhd, nën drejtimin e kryetarit Mariglen Disha.

Fondi limit: 26,242,388 lekë pa TVSH rreth 315 milionë lekë të vjetra me TVSH.

Vlera fituese: 23,362,062 lekë pa TVSH  afro 280 milionë lekë të vjetra me TVSH.

Fituesi: kompania AVDULI, në pronësi të biznesmenit Arben Avduli.

Në garë morën pjesë vetëm dy kompani, ndërsa oferta fituese përbën 89% të fondit limit – një raport që në çdo manual auditimi cilësohet si mungesë reale gare dhe dyshim për paracaktim të rezultatit.

Kur teleskopi bëhet simbol i farsës publike

Në pamje të parë, ndërtimi i një “observatori astronomik” mund të tingëllojë si një investim në turizëm, shkencë apo edukim.

Por pyetja që ngre çdo qytetar i Librazhdit është më tokësore:

A ka kuptim të investosh në teleskop, kur qyteti s’ka as ujë të pijshëm e as rrugë të kalueshme?

Në shumë zona të bashkisë, banorët ende e mbushin ujin me kova, kalojnë përmes baltës në dimër dhe përballen me mungesë ndriçimi e kanalizimesh.

Ndërsa për ta, bashkia vendos të ndërtojë një “zip-line” për turistët që s’kanë si të mbërrijnë aty.

Një “ballkon panoramik” për të parë malet, por jo varfërinë poshtë tyre.

Një “observator astronomik” për të parë yjet, por jo korrupsionin mbi tokë.

Kush fiton nga projektet që s’kanë lidhje me realitetin

Kostoja e lartë dhe mungesa e konkurrencës janë shenja të një tenderi të mbyllur, që ndoshta i shërben më shumë riformatimit të fondeve publike, sesa zhvillimit real të zonës.

Kjo praktikë  investime të panevojshme me etiketa “turistike”  është kthyer në metodë klasike për të justifikuar shpenzime luksi në bashki të varfra.

Në shumë raste, këto projekte mbeten gjysmë të braktisura, të pambaruara, ose thjesht monumente të betonit dhe pazareve politike.

Një “qiell tenderash” mbi një popull pa rrugë

Ndërsa komunitetet përreth Librazhdit përballen çdo dimër me izolim, mungesë infrastrukture dhe punësimi, bashkia zgjedh të ndërtojë një “park aventuresk” si fasadë e zhvillimit imagjinar.

Në të vërtetë, pas çdo teleskopi që blihet me fond publik, fshihet një optikë tjetër — ajo e korrupsionit vendor, që sheh më qartë si ndahen tenderat, jo si zhvillohet qyteti.

Në fund të fundit…

Librazhdi nuk ka ujë.

Nuk ka rrugë.

Nuk ka punë.

Por së shpejti, do të ketë një teleskop për të parë më qartë si humbin paratë e qytetarëve në qiellin e tenderave publikë.