ADN-ja “tradhton” autorët

Një detaj i vetëm, një gjurmë ADN-je, ishte çelësi që ndihmoi hetuesit francezë të zhbllokonin çështjen e grabitjes spektakolare në Muzeun e Luvrit, duke çuar në arrestimin e dy personave mbrëmjen e së shtunës.

Sipas televizionit BFMTV, që citon burime pranë grupit hetimor, njëri prej të dyshuarve u identifikua pikërisht falë gjurmës biologjike të gjetur në vendin e ngjarjes.

Që prej momentit të grabitjes së bujshme, e cilësuar nga mediat si “grabitja e shekullit”, ekipet e policisë mjeko-ligjore kanë punuar intensivisht në zonë për të mbledhur çdo provë të mundshme.

Prokurorja e Parisit, Laure Beccuau, deklaroi të enjten se nga skena e krimit janë marrë më shumë se 150 mostra biologjike, përfshirë gjurmë ADN-je, shenja gishtash dhe materiale të tjera që mund të ndihmojnë hetimin.

Në vendin e grabitjes, autorët kishin lënë pas disa objekte si një helmetë, radio dore, jelek sigurie dhe mjet prerës metalesh, sende që besohet se kanë ndihmuar ekspertët në identifikimin e tyre.

Pas analizave laboratorike, njëra nga gjurmët rezultoi përputhëse me ADN-në e një personi të njohur më parë për policinë, çka çoi në arrestimin e tij.

Të arrestuarit janë rreth 30 vjeç dhe banues në zonën e Aubervilliers, në periferi të Parisit. Ende nuk është përcaktuar roli i saktë i secilit në grabitje, por hetuesit i konsiderojnë “të dyshuarit kryesorë”.

Sipas Le Monde, njëri prej tyre ka shtetësi franceze dhe algjeriane, dhe u ndalua në aeroportin Charles de Gaulle, teksa përgatitej të udhëtonte drejt Algjerisë. Personi tjetër është me shtetësi franceze.

Forcat e rendit kishin vënë në ndjekje të dy të rinjtë për të zbuluar rrjetin e bashkëpunëtorëve dhe vendndodhjen e bizhuterive të vjedhura, të cilat vlerësohen në rreth 88 milionë euro.

Hetimi mori përshpejtim sapo policia zbuloi se njëri prej tyre po planifikonte të arratisej, çka i detyroi hetuesit të vepronin menjëherë.
Megjithatë, bizhuteritë e grabitura ende nuk janë gjetur, ndërsa kërkimet vazhdojnë në disa qytete të Francës dhe jashtë vendit.