Nga kush ka frikë? Rama porosit makinë të blinduar 800 mijë €

Gazetari Lavdrim Lita ka ngritur akuza të forta ndaj qeverisë dhe kryeministrit Edi Rama, lidhur me një tender prej 800 mijë eurosh për blerjen e një makine të re blinduar për kreun e qeverisë. Lita e ka cilësuar këtë shpenzim si të papërballueshëm dhe provokues për qytetarët shqiptarë.

Në emisionin “Off the Record” në A2 CNN, Lita tha:

“Lajmi është që kryeministri Rama ka tenderuar 800 mijë euro për një makinë të blinduar. Pyetja është: nga kush sulmohet ky zotëri? Nga kush ka frikë?”

Sipas tij, në një vend ku mungojnë fondet për shërbime publike, blerja e një automjeti luksoz për kryeministrin është e papranueshme dhe jep një mesazh të gabuar për qytetarët që përballen me vështirësi ekonomike.

Gazetari shtoi se pas 13 viteve në pushtet dhe në mandatin e katërt, Rama nuk mund të justifikojë një shpenzim të tillë. Ai e krahasoi luksin e qeverisë shqiptare me shpenzimet e udhëheqësve të fuqive botërore.

“Do të ecë edhe kryeministri ynë me makinat e blinduara të tipit të Donald Trump-it? Nga kush ka frikë ky?”, pyeti Lita.

Ky reagim ka ndezur debat në publik për shpenzimet e qeverisë dhe prioritetet e saj financiare, ndërsa qytetarët shprehin shqetësim për luksin në kosto të shërbimeve publike.