U ekzekutua në SHBA, 44-vjeçari ishte i afërm i Elvis Shkambit

Një ngjarje e rëndë tronditi mbrëmjen e së dielës komunitetin shqiptar në Michigan të SHBA-ve, ku një 44-vjeçar me origjinë shqiptare u ekzekutua me armë zjarri pranë vendit të tij të punës. Viktima është identifikuar si Francesk Shkambi, banues në Howell dhe menaxher-bashkëpronar i restorantit Prime 7 në Commerce Township.

Si ndodhi ngjarja?

Sipas mediave amerikane, ngjarja ka ndodhur rreth orës 21:30 (me orën lokale), në verandën e restorantit, ku Shkambi u gjet i plagosur rëndë me armë zjarri. Ai u dërgua urgjentisht në spital, por nuk mundi t’u mbijetonte plagëve, duke ndërruar jetë pak minuta më vonë.

Vetëm 20 minuta pas të shtënave, një 65-vjeçar nga Farmington Hills u paraqit vetë në polici dhe u arrestua pa bërë rezistencë. Autoritetet sekuestruan një pistoletë 9 mm, e cila dyshohet të jetë arma e krimit dhe e raportuar më herët si e vjedhur.

Pistat e hetimit

Policia bëri të ditur se viktima dhe autori njiheshin dhe mes tyre kishte pasur një konflikt të kohëve të fundit, i cili dyshohet se ka degjeneruar në përplasjen e armatosur. Motivi nuk është bërë ende publik, ndërsa çështja pritet t’i kalojë prokurorisë për ngritjen e akuzave zyrtare.

Reagimet pas vrasjes

Stafi dhe familjarët kanë shprehur tronditjen e thellë, duke e përshkruar Shkambin si:

“Njeri të dashur, punëtor, të respektuar dhe të përkushtuar ndaj komunitetit.”

Restoranti Prime 7 njoftoi mbylljen e aktivitetit deri në një afat të pacaktuar për shkak të ngjarjes së rëndë.

Lidhjet familjare dhe fushata GoFundMe

Burime në të dhënat publike tregojnë se Francesk Shkambi ishte i afërm me Elvis Shkambin, 30-vjeçarin që vrau gjyqtarin Astrit Kalaja në sallën e gjyqit në Tiranë, më 6 tetor.

Pak javë më parë, Francesk Shkambi kishte hapur një fushatë GoFundMe për Elvis dhe Gjon Shkambin, duke u prezantuar si familjar i tyre. Qëllimi i saj ishte mbledhja e fondeve për “mbrojtje ligjore profesionale dhe të pavarur”, dhe deri në momentin e mbylljes kishte grumbulluar mbi 8,000 dollarë.