EMRI/ “Fantazma” shqiptare arratiset për herë të katërt nga burgu

Arratisje si në film gjatë natës së 7 dhjetorit në burgun e Operas. I dënuari Taulant Toma ka prerë hekurat e qelisë dhe është larguar duke përdorur çarçafë të lidhur, për t’u zhdukur më pas pa lënë asnjë gjurmë. Ngjarja dyshohet të ketë ndodhur gjatë ndërrimit të turnit të rojave, çka ka krijuar momentin e duhur për të realizuar planin e tij.

Hetimet paraprake tregojnë se arratisja ishte përgatitur deri në detajin më të vogël, gjë që shpjegon shpejtësinë e jashtëzakonshme me të cilën u krye. Ende mbetet mister mënyra se si Toma mundi të kalonte murin e lartë rrethues të burgut dhe nëse ka pasur ndihmën e ndonjë bashkëpunëtori.

Jo arratisja e parë

Taulant Toma, i dënuar për vjedhje dhe grabitje, me dënim që përfundon në vitin 2041, njihet për arratisjet e tij të mëparshme. Në shkurt të vitit 2013 ai iku nga burgu i Parmës së bashku me Frokaj Vamentin, i cili më vonë u vra gjatë një grabitjeje në një vilë. Po atë vit, Toma u arrestua në Belgjikë, por u arratis sërish në dhjetor nga burgu i Latinës, pranë Liezhit. Ndërkohë, në vitin 2009 ai kishte arritur të largohej edhe nga burgu i Ternit.

Operacion i gjerë kërkimi

Pas arratisjes, Prefektura ka nisur një operacion të gjerë kërkimi. Janë ngritur postblloqe në zonat kryesore, ndërsa kontrolle intensive po kryhen në zonat rurale dhe industriale përreth. Megjithatë, ekziston frika se Toma mund të ketë arritur të largohet nga zona shumë shpejt.