Paralajmërimi nga Ukraina

Shërbimi ukrainas i Inteligjencës së Jashtme ka informuar presidentin Volodimir Zelenski se Federata Ruse po bëhet gjithnjë e më e varur nga mbështetja politike dhe investimet kineze, duke sinjalizuar një zhvendosje të qartë të ekuilibrave gjeopolitikë në rajon.

Sipas raportit, ekonomia dhe sektori shtetëror rus po i dorëzojnë gradualisht hapësirë ndikimit kinez, me tendencë në rritje të desovranizimit të pjesëve të territorit rus në favor të Pekinit. Një pjesë e tokave të pasura me burime natyrore po shfrytëzohen nga kompani kineze për projekte afatgjata, ndërsa zonat më pak produktive Rusia po ia shet Kinës, duke hapur rrugën për praninë strategjike të saj në Lindjen e Largët.

Raporti evidenton gjithashtu se Pekini po forcon bashkëpunimin me Moskën edhe në sektorët ushtarako-industrial, në kohën kur Rusia vazhdon luftën në Ukrainë dhe përballet me sanksione të gjera ndërkombëtare. Inteligjenca ukrainase thekson se ky orientim krijon një varësi të re ekonomike dhe teknologjike të Rusisë ndaj Kinës, që mund të sjellë pasoja të thella në balancat e ardhshme ndërkombëtare.

Burimet e shërbimit të inteligjencës në Kiev konfirmojnë se vlerësime të ngjashme ndahen edhe nga agjenci partnere perëndimore, duke përforcuar idenë se ndikimi kinez në Rusi nuk është më thjesht bashkëpunim ekonomik, por strategji gjeopolitike me efekte afatgjata.

Ky zhvillim ngre pikëpyetje të mëdha mbi të ardhmen e sovranitetit rus dhe rolin e Kinës në hartën e re të fuqive globale.