Kërkohen 45 vite burg për Thaçin dhe krerët e tjerë të UÇK-së

Prokurorja e Zyrës së Prokurorit të Specializuar, Kimberly West, ka kërkuar dënim prej 45 vitesh burg për ish-krerët e Ushtrisë Çlirimtare të Kosovës: Hashim Thaçi, Kadri Veseli, Rexhep Selimi dhe Jakup Krasniqi, duke theksuar se përgjegjësia penale është individuale dhe nuk i atribuohet UÇK-së si strukturë.

Gjatë paraqitjes së saj në Gjykatën Speciale, West deklaroi se prokuroria kërkon një vendim fajësie për të gjitha pikat e aktakuzës dhe një dënim të vetëm prej 45 vitesh, i bazuar në rolin dhe kontributin individual të secilit të akuzuar në krimet e pretenduara.

Sipas saj, akuzat lidhen me indikacione për krime lufte dhe krime kundër njerëzimit, të cilat i cilësoi si tepër të rënda dhe që nuk e kanë humbur rëndësinë me kalimin e kohës.

Prokurorja pretendoi se rreth 100 persona janë vrarë dhe qindra të tjerë janë keqtrajtuar në dhjetëra qendra ndalimi të lidhura me UÇK-në gjatë luftës në Kosovë. Ajo përmendi ekzistencën e mbi 50 kampeve të ndalimit, ku sipas prokurorisë janë kryer abuzime ndaj personave të konsideruar kundërshtarë ose bashkëpunëtorë të forcave serbe.

West argumentoi se çështja lidhet me përpjekjen e katër të akuzuarve për të fituar dhe ruajtur kontroll të plotë politik dhe ushtarak në Kosovë gjatë luftës. Sipas saj, çdo person që shihej si kundërshtar i këtij synimi, apo që nuk mbështeste UÇK-në, rrezikonte të përballej me ndalim, dhunë apo eliminim.

Ajo shtoi se ndër viktimat e pretenduara përfshiheshin edhe persona të lidhur me Lidhjen Demokratike të Kosovës, si dhe pjesëtarë të komuniteteve rome dhe serbe. Sipas prokurorisë, këto veprime synonin forcimin e kontrollit dhe eliminimin e kundërshtarëve të perceptuar.

Prokurorja theksoi se procesi gjyqësor nuk është kundër UÇK-së si organizatë, por ndaj individëve të akuzuar për përgjegjësi personale në krimet e pretenduara. Vendimi përfundimtar i gjykatës pritet pas përfundimit të fazës së argumenteve dhe vlerësimit të provave nga trupi gjykues.