Gara për kreun e Autoritetit të Konkurrencës, emrat e kandidatëve

Katër kandidatë janë zyrtarisht në garë për të marrë drejtimin e Autoriteti i Konkurrencës.

Komisioni Parlamentar për Financat, Ekonominë dhe Punësimin zhvilloi një seancë dëgjimore me kandidatët që kanë aplikuar për pozicionin e anëtarit të Komisionin të Konkurrencës, një post që pritet të shoqërohet edhe me emërimin si kryetar i institucionit.

Në këtë proces konkurrues janë përfshirë katër kandidatë: Pajtim Melani, Elidian Balla, Evis Noçka dhe kryetari aktual i institucionit, Denar Biba.

Sipas kuadrit ligjor në fuqi, anëtarët e Komisionit të Konkurrencës zgjidhen nga Kuvendi i Shqipërisë. Një nga anëtarët propozohet nga Presidenti i Republikës së Shqipërisë, dy propozohen nga Këshilli i Ministrave i Shqipërisë dhe dy të tjerë nga vetë Kuvendi.

Ligji përcakton që anëtarët e Komisionit të zgjidhen me shumicë votash, në një seancë ku duhet të jenë të pranishëm më shumë se gjysma e deputetëve të Kuvendit.

Mandati i tyre është pesëvjeçar, ndërsa po Kuvendi ka kompetencën të emërojë edhe kryetarin e Komisionit të Konkurrencës.