Botërori 2026/ Grabitet Kombëtarja e Anglisë në SHBA

Përfaqësuesja e Anglisë është përballur me një incident të pazakontë vetëm pak ditë para ndeshjes së parë në Kupën e Botës 2026, pasi një pjesë e pajisjeve të ekipit u vodh gjatë transportit nga baza përgatitore në Florida drejt qendrës stërvitore në Kansas City. Sipas raportimeve, mes sendeve të vjedhura ndodhen këpucët e ndeshjeve të disa prej lojtarëve kryesorë të “Tre Luanëve”, si edhe topa zyrtarë të turneut dhe pajisje stërvitore.

Vjedhja ndodhi përpara se skuadra e drejtuar nga Thomas Tuchel të zhvillonte seancën e parë stërvitore në kompleksin “Swope Soccer Village” në Missouri. Policia e Kansas City ka nisur hetimet për ngjarjen dhe ka konfirmuar se dy persona të dyshuar janë ndaluar. “Dy persona me interes për hetimin janë marrë në paraburgim në pritje të verifikimeve të mëtejshme”, deklaroi një zëdhënës i policisë për “The Guardian”.

Federata Angleze e Futbollit nuk ka komentuar ende zyrtarisht ngjarjen, ndërsa pritet të bashkëpunojë me autoritetet lokale për rikuperimin e pajisjeve të vjedhura. Pavarësisht këtij problemi logjistik, Anglia vazhdon përgatitjet për sfidën e parë të Grupit L ndaj Kroacisë, që do të zhvillohet të mërkurën në Dallas. Skuadra e Tuchel vjen në Botëror pas një faze pozitive përgatitore në Florida, ku fitoi ndeshjet miqësore ndaj Zelandës së Re dhe Kosta Rikës.

Në aspektin sportiv, Jude Bellingham ka dhënë sinjale të mira dhe synon një vend titullari në mesfushë, ndërsa Bukayo Saka vijon garën me kohën për të rikuperuar plotësisht nga problemet me tendinën e Akilit. Në mbrojtje, Ezri Konsa dhe John Stones mund të preferohen në qendër, ku si konkurrent kanë Marc Guéhi.