Pas Çim Fushës, Myzyri ‘qeras’ edhe Arbër Abazin me 1.1 mln euro

Një tjetër procedurë prokurimi publik ngre pikëpyetje serioze mbi mënyrën e shpërndarjes së fondeve publike në Shqipëri. Pas rastit të përfolur me Shkëlqim Fushën, edhe drejtuesi i Operatorit të Blerjeve të Përqendruara, Jonaid Myzyri, akuzohet se ka ndjekur të njëjtën praktikë, duke skualifikuar ofertat më të ulëta për t’i hapur rrugë një kontrate me vlerë miliona euro për biznesmenin Arbër Abazi.

Bëhet fjalë për tenderin me objekt “Loti 1: Shërbimi i pastrimit të zonës bregdetare për Bashkitë Shkodër, Lezhë, Durrës, Kavajë dhe Pogradec”, me një fond limit prej rreth 1 miliard lekësh (afërsisht 1.1 milion euro). Në këtë garë morën pjesë tre operatorë ekonomikë, ku një bashkim kompanish paraqiti një ofertë dukshëm më të ulët, me diferencë rreth 227 milion lekë më pak se oferta fituese.

Pavarësisht avantazhit të qartë ekonomik që do të sillte kursime të konsiderueshme për buxhetin e shtetit, ky bashkim operatorësh u skualifikua, së bashku me një tjetër subjekt pjesëmarrës. Në përfundim, fitues u shpall kompania “ALKO IMPEX CONSTRUCTION”, në pronësi të Arbër Abazit, me një ofertë që arrin në 97.2% të fondit limit, shumë pranë vlerës maksimale të parashikuar.

Emri i Arbër Abazit është përfshirë më herët në hetime të strukturave të posaçme kundër korrupsionit. Në fillim të këtij viti, autoritetet ndërmorën kontrolle në ambientet e tij, ku u sekuestruan materiale dhe pajisje në kuadër të një hetimi që lidhet me dyshime për korrupsion në projekte infrastrukturore. Dyshimet përfshijnë skema të manipulimit të tenderave dhe përfitime të paligjshme përmes kontratave publike.

Megjithatë, zhvillimet e fundit tregojnë se këto hetime nuk kanë ndikuar në ndalimin e përfitimit të kontratave të reja publike nga i njëjti subjekt. Për më tepër, raportimet mbi lidhjet e tij politike dhe afërsinë me figura të rëndësishme të qeverisë shtojnë dyshimet për ndikim në proceset e prokurimit.

Ky rast nuk është i izoluar. Vetëm pak ditë më parë, një tjetër tender me vlerë afro 993 milionë lekë për pastrimin e vijës bregdetare në disa bashki të tjera iu dha një kompanie tjetër, pas skualifikimit të ofertave më ekonomike. Praktika e përsëritur e përzgjedhjes së ofertave pranë fondit limit, duke anashkaluar alternativat më të leverdishme, po ngre shqetësime mbi transparencën dhe konkurrencën në prokurimet publike.

Situata bëhet edhe më paradoksale kur merret parasysh se disa nga personat kyç të përfshirë në këto procedura janë aktualisht subjekt hetimesh për çështje që lidhen pikërisht me tenderat publikë. Kjo ka shtuar perceptimin për mungesë llogaridhënieje dhe për një sistem që vijon të funksionojë pavarësisht ndërhyrjeve të drejtësisë.