“U dënova padrejtësisht, kam mbi dy vjet pa takuar familjen”

Besmir Gjezari, një nga të dënuarit që ka lënë qelinë në burgun e Drenovës falë amnistisë penale, ka reaguar publikisht pas lirimit, duke hedhur akuza të forta për procesin që çoi në dënimin e tij. Ai deklaron se është dënuar me 5 vite burg për prodhim dhe shitje të lëndëve narkotike, nga të cilat ka vuajtur 2 vite e 7 muaj, por këmbëngul se është i pafajshëm.

Sipas Gjezarit, vendimi ndaj tij ka qenë i padrejtë dhe i ndikuar, ndërsa ai drejton akuza konkrete ndaj oficerit të Policisë Gjyqësore, Mariglen Beqo. Ish-i burgosuri shprehet se gjatë qëndrimit në burg është privuar edhe nga e drejta për të takuar familjen, duke e konsideruar këtë si një padrejtësi të rëndë.

Ai paralajmëron se do të ndjekë rrugët ligjore për të kërkuar drejtësi, ndërsa shprehet se ndihet i kërcënuar për jetën, së bashku me familjen e tij.

“Unë jam akuzuar për lëndë narkotike, prodhim dhe shitje të lëndëve narkotike. Jam dënuar me pesë vite burg. Vuajta dy vite e shtatë muaj. Dhe unë nuk jam kapur me asnjë lloj gjëje. Jam dënuar padrejtësisht nga ana e Prokurorisë së Korçës dhe Gjykatës, dhe këtë e kam nga oficeri i policisë gjyqësore, Mariglen Beqo. E ka me tendencë. Nga ai u nis ajo. Dhe më ka marrë dhe familjen në qafë ai dhe kam dy vite e kusur këtu që s’po takoj dot familjen time. Do ta kërkoj drejtësi dhe kjo është vetëm fillimi. Sa kam dalë, do t’i nis të gjitha gjërat nga e para. Nuk i kam takuar familjarët se nuk i ka lejuar prokurorja. Atë çështje që s’kam pasur, dhe ky ndikim ka qenë nga oficeri i policisë gjyqësore për të më hequr dhe padrejtësisht takimin, të drejtën e fëmijës. Se kam një fëmijë të mitur, të moshës 3 vjeçare dhe e kam lënë gati një vit, një vit e pak, dhe nuk e kam takuar, nuk e kam parë. Nga padrejtësitë që më ka bërë oficeri i policisë gjyqësore, Mariglen Beqo. Ai ka marrë dhe presion e kërcënime nga njerëz të drejtësisë, dhe ndihem shumë i kërcënuar dhe i rrezikuar, si unë dhe familja ime. Jam i kërcënuar me jetë, si unë dhe familja ime. Më kanë kthyer gjëra personale. Për çfarë, oficeri i policisë gjyqësore se unë nuk e di dhe nuk e kuptoj akoma përse, arsye. Për çfarë ka ndikuar mos takimi me familjen dy vite e kusur këtu, takimet me njerëzit e mi? Unë nuk e kuptoj se çfarë ka bërë vaki këtu. Dhe të më hiqet e drejta e fëmijës padrejtësisht, se ndikon oficeri i policisë gjyqësore. Për çfarë arsye? Atë e di ai, dhe këtë do ta kërkojmë me drejtësinë. Po, normale, që po, normale. Jam familjar, kam një fëmijë të mitur, kam një biznes timin, dhe dua t’i përkushtohem familjes”, u shpreh Besmir Gjezari.

Rasti i tij pritet të ngjallë debat mbi procedurat hetimore dhe respektimin e të drejtave të të dënuarve, ndërsa vetë Gjezari thekson se beteja e tij ligjore sapo ka nisur.