Prokurori i SPAK-ut dorëzon kandidaturën në KLP

Prokurori i SPAK, Adnan Xholi, është kandidati i parë që ka shprehur zyrtarisht interes për postin e Prokurorit të Përgjithshëm, duke dorëzuar aplikimin pranë Këshillit të Lartë të Prokurorisë (KLP).

Xholi nuk është një emër i ri në garat për drejtimin e institucioneve të drejtësisë, pasi më herët ka kandiduar dy herë për drejtues të Prokurorisë së Posaçme (SPAK). Ai ka mbajtur gjithashtu detyrën e shefit të Seksionit Kundër Krimit të Organizuar në këtë institucion.

Afati për paraqitjen e kandidaturave për kreun e Prokurorisë së Përgjithshme përfundon më 1 gusht, në orën 00:00, ndërsa pritet që deri në këtë datë të regjistrohen edhe emra të tjerë në garë.

Sipas procedurës ligjore, deri më 14 gusht KLP do të kryejë verifikimin e kandidatëve për plotësimin e kritereve të kërkuara. Në përfundim të këtij procesi, KLP do t’i propozojë Kuvendit tre kandidatë, nga të cilët Parlamenti do të zgjedhë Prokurorin e ri të Përgjithshëm për një mandat 7-vjeçar.

Mandati aktual i Prokurorit të Përgjithshëm, Olsian Çela, përfundon në muajin dhjetor, duke hapur kështu garën për drejtimin e një prej institucioneve më të rëndësishme të drejtësisë në vend.