Zbardhet dëshmia e edukatores: E rraha 2-vjeçarin se nuk po flinte gjumë

Një rast i rëndë dhune ndaj një fëmije 2-vjeçar në një kopsht privat në Tiranë është zbardhur pas dëshmisë së vetë edukatores së arrestuar.

32-vjeçarja Brunilda Haxhiu ka pranuar përpara hetuesve se e ka goditur fëmijën, duke justifikuar veprimin me faktin se “nuk po e zinte gjumi dhe nuk po e duronte dot”.

Ngjarja u denoncua nga babai i fëmijës, i cili vuri re shenja dhune në fytyrën e tij dhe e dërgoi menjëherë në spital. Sipas ekzaminimeve mjekësore, i mituri kishte një të nxirë në faqe dhe skuqje në zonën e veshëve.

Gjatë marrjes në pyetje, edukatorja nuk e ka mohuar veprimin, por ka pranuar se e ka qëlluar me shpullë fëmijën. Kjo dëshmi përputhet edhe me pamjet filmike të siguruara nga ambientet e kopshtit, të cilat sipas burimeve konfirmojnë ushtrimin e dhunës fizike.

Rasti ka shkaktuar reagime të forta, ndërsa autoritetet po vijojnë hetimet për të dokumentuar plotësisht ngjarjen dhe përgjegjësitë ligjore.