Pas kostos 182 milionë €, Check-up dhe Dializa kthehen në shtet

Qeveria ka vendosur të marrë nën administrim publik dy nga shërbimet më të diskutuara të viteve të fundit në sistemin shëndetësor: kontrollin bazë të popullsisë (check-up) dhe shërbimin e dializës. Ky vendim shënon përfundimin e kontratave koncesionare për këto shërbime, të cilat nuk do të rinovohen pas skadimit.

Ministrja e Shëndetësisë, Evis Sala, konfirmoi se kontratat përkatëse përfundojnë në muajt shtator dhe nëntor të këtij viti, duke theksuar se pas kësaj periudhe këto shërbime do të ofrohen drejtpërdrejt nga institucionet shtetërore.

Vendimi vjen pas një dekade funksionimi të këtyre koncesioneve, të cilat kanë pasur një kosto të konsiderueshme për buxhetin e shtetit. Në total, për dy kontratat janë shpenzuar rreth 17.2 miliardë lekë, ekuivalente me afro 182 milionë euro.

Sipas të dhënave financiare, koncesioni i check-up-it ka përfituar rreth 8.76 miliardë lekë, ndërsa shërbimi i dializës ka kushtuar rreth 8.5 miliardë lekë gjatë gjithë periudhës së zbatimit.

Ky hap pason një tjetër vendim të rëndësishëm të qeverisë për të rikthyer në administrim shtetëror edhe shërbimin e sterilizimit, një tjetër kontratë koncesionare që ka qenë në qendër të debatit publik dhe hetimeve.

Koncesioni i sterilizimit ka pasur një kosto mbi 150 milionë euro dhe, sipas hetimeve të institucioneve të drejtësisë, dyshohet se është shoqëruar me shkelje të rënda dhe elementë korruptivë.

Rikthimi i këtyre shërbimeve në sektorin publik pritet të ndikojë drejtpërdrejt në mënyrën e menaxhimit të sistemit shëndetësor, ndërsa mbetet për t’u parë se si do të përkthehet ky ndryshim në cilësinë e shërbimit për qytetarët.