I arrestuari dëmton dhomën e ndalimit, pezullohen tre efektivë policie

Tre punonjës të Policisë së Sarandës janë pezulluar nga detyra pas një incidenti të regjistruar në ambientet e dhomave të ndalimit të komisariatit, ku një person i arrestuar ka shkaktuar dëmtime.

Sipas Policisë së Vlorës, shtetasi me inicialet D. S. ishte ndaluar në zbatim të një vendimi gjykate, për disa vepra penale, dhe ishte vendosur në dhomat e paraburgimit të komisariatit.

Gjatë qëndrimit aty, D. S. ka shfaqur probleme të gjendjes emocionale dhe sjellje agresive. Në një moment, ai ka dëmtuar kamerën e sigurisë në dhomë, tavanin, si dhe disa orendi, konkretisht një karrige dhe një tavolinë.

Për shkak të gjendjes së tij, në komisariat është thirrur urgjenca mjekësore. I arrestuari ka marrë ndihmën e nevojshme shëndetësore, ndërsa për ngjarjen është njoftuar edhe Prokuroria dhe janë kryer procedurat përkatëse.

Në fokus të verifikimeve kanë kaluar edhe punonjësit e policisë që ndodheshin në shërbim në momentin e incidentit.

Tre efektivë janë pezulluar nga detyra, pasi dyshohet se nuk kanë ndërhyrë në kohë për të parandaluar dëmtimin e kamerës dhe orendive nga personi i arrestuar.

Drejtoria Vendore e Policisë Vlorë ka nisur hetimin administrativ për të sqaruar rrethanat e ngjarjes dhe për të përcaktuar përgjegjësitë e punonjësve të përfshirë.

Ndërkohë, në bashkëpunim me Drejtorinë e Standardeve Profesionale në Policinë e Shtetit, ndaj tre efektivëve është nisur edhe procedura disiplinore.