Mozzik shpërthen pas “Marshit për Liri”: M’u sha nëna, gruaja dhe vajza

Pjesëmarrja e Mozzik në “Marshin për Liri” në Prishtinë ka sjellë një reagim të fortë nga reperi, i cili ka vendosur të përgjigjet publikisht ndaj kritikave që, sipas tij, janë shoqëruar edhe me ofendime ndaj familjes së tij.

Pas përfundimit të marshimit në mbështetje të ish-krerëve të UÇK-së që po përballen me procesin gjyqësor në Hagë, Mozzik ka treguar se ka lexuar komente të shumta në artikujt që pasqyronin pjesëmarrjen e tij.

Sipas reperit, disa prej tyre nuk janë kufizuar vetëm te kritikat ndaj tij, por kanë prekur edhe njerëzit e tij më të afërt.

“M’u kish sha nana, gruaja, vajza, familja e fisi, veç pse dola në marsh”, shkruan Mozzik në reagimin e tij.

Reperi pretendon se ka kontrolluar edhe profilet e personave që kishin lënë komentet dhe se një pjesë e tyre rezultonin, sipas tij, si llogari të rreme.

Mozzik i ka lidhur këto reagime me persona që, në këndvështrimin e tij, nuk kanë qenë pjesë e marshimit.

“Këta janë pikërisht ata që nuk dolën në protestë. Këta janë e keqja e këtij vendi. Këta janë pjellë e Beogradit”, shprehet ai.

Në vijim të reagimit, reperi ka ashpërsuar gjuhën edhe ndaj atyre që nuk mbështesin UÇK-në, duke u kërkuar të mos bashkohen me kauzën kur e shohin të nevojshme.

“Largohuni prej rreshtit tonë. Nuk na duheni as sot me u rreshtu me ne. Nuk jeni rreshtu kurrë me ne, e as nuk keni me u rreshtu kurrë”, shkruan Mozzik.

Në mesazhin e tij, reperi rikthen në vëmendje edhe pasojat e luftës së Kosovës, duke përmendur vuajtjet e shqiptarëve dhe familjet që humbën njerëzit e tyre.

Në fund, ai ka bërë homazh për dëshmorët, ndërsa një pjesë e veçantë e reagimit lidhet me datën 16 shtator.

Mozzik shprehet me shpresë se në këtë datë mund të ndodhë një zhvillim që, sipas tij, do të mbetet i shënuar në histori.

Reagimi vjen pas një prej daljeve publike më të forta të reperit në mbështetje të ish-krerëve të UÇK-së që po përballen me procesin gjyqësor në Hagë.